فراکسیۆنەکانی نەوەی نوێ، یەکگرتوو، کۆمەڵ و یەکێتی لە پەرلەمانی عێراق رایانگەیاند، سەرجەم هەوڵەکانی دواخستنی هەڵبژاردن رەتدەکەنەوە.
ئەمڕۆ سێشەممە، فراکسیۆنەکانی نەوەی نوێ، یەکگرتوو، کۆمەڵ و یەکێتی لە راگەیاندراوێکدا کە واژۆی سەرۆکی فراکسیۆنەکانی پێوەیە ئاماژەیان بەوە کردووە، بەتوندی هەر هەوڵێک بۆ دواخستنی هەڵبژاردنی پەرلەمانی هەرێم و ئەنجامنەدانی لە ١٠ـی حوزەیراندا رەت دەکەنەوە، چونکە هەڵبژاردن مافێکی دەستووری خەڵکی هەرێمە.
باس لەوەش کراوە، هەڵبژاردنی پەرلەمانی هەرێم سێ جار و لەسەر خواست و بەرژەوەندی حزبێک دواخراوە کە ئەوەش پێشێلکردنی یاساکانی دەستووری هەرێم و بڕیارەکانی دادگای فیدراڵی و بڕیارەکانی کۆمسیۆنە کە هەموو هەوڵەکانی خستووەتە گەڕ بۆ ئەنجامدانی هەڵبژاردن لە کاتی خۆیدا.
ئەوەش خراوەتە روو، هیچ حزب و لایەنێک بۆی نییە توانا ئەمنی و سەربازییەکانی بەکاربهێنیت بۆ زاڵبوون بەسەر یاسا و بڕیارە دەستورییەکاندا.
ئەوەش هاتووە، "داوا لە سەرجەم لایەنە فیدراڵییەکان و پەرلەمانی عێراق و ئەنجومەنی وەزیران و دادگای فیدراڵی و کۆمسیۆن دەکەین رووبەڕووی ئەو رێگریانە ببنەوە و زامنی ئەنجامدانی هەڵبژاردنی هەرێم لە ١٠ـی حوزەیراندا بکەن".
بە گوێرەی زانیارییەکانی ئێن ئاڕ تی، تاکە
ئامانجی سەردانەکەی نێچیرڤان بارزانی بۆ بەغدا، دواخستنی هەڵبژاردنی خولی شەشەمی
پەرلەمانی کوردستان بووە، نەک مووچە و قوتی مووچەخۆران و هاوڵاتیانی هەرێم.
بەهۆی
ترسیان لە تۆڵەی خەڵک و شکستیان لە هەڵبژاردندا، پارتی و یەکێتی بەردەوام لە هەوڵی
دواخستنی هەڵبژاردنی خولی شەشەمی پەرلەمانی کوردستاندان کە بڕیارە لە رۆژی ١٠ـی
حوزەیرانی ئەمساڵدا بەڕێوە بچێت.