لە دوای کۆبوونەوەکە، زێلێنسکی لە کۆنگرەیەکی رۆژنامەنووسیدا رایگەیاند، روسیا ئامادەکاری دەکات بۆ ئەنجامدانی هێرشیکی نوێ بۆ سەر خاکی ئۆکرانیا و هەربۆیە داوا لە هاوپەیمانان و بەتایبەت ئەمریکا کرد کە لە پڕچەککردنی وڵاتەکەی هاوکار بن. 

باسی لەوەش کرد، بۆ بەرەنگاربوونەوەی هێرشەکانی رووسیا پێویستیان بە تۆپ، چەکی پێشکەوتوو و سیستەمی بەرگریی پاتریۆت هەیە. وتیشی، " پێویستە بە زووترین کات چەک و تەقەمەنی بگەیەندرێتە ئۆکرانیا". 

ئەوەشی خستە روو، بڕیارە لە مانگی تەمووزی ئەمساڵدا سەرکردەکانی ناتۆ کۆبوونەوەیەک ئەنجام بدەن، ئەوەش دەبێتە دەرفەتێک بۆ بەهێزکردنی هاوپەیمانییەتی وڵاتانی ئەندام لە ناتۆ و تێیدا بڕیاریش لەسەر بە ئەندامبوونی ئۆکرانیا لە ناتۆ دەدرێت.

لە ٢٤ـی شووباتی ٢٠٢٢، بە فەرمانی ڤلادیمێر پوتنی سەرۆکی روسیا، سوپای ئەو وڵاتە هێرشی زەمینیان بۆ سەر خاکی ئۆکرانیا دەستپیکرد و لەو کاتەوە بە هەزاران کەس لە هەردوولا کوژراون بەهۆی جەنگەکەوە.

ئەوەش لە کاتێکدایە، هێرشی بەرفراوانی درۆنەکان لە ساڵی رابردووەوە بە شێوەیەکی فراوان و ئاشکرا دەستی پێکردووە و هەردوو وڵات بە شێوەیەکی بەرچاو دەستیان کردووە بە زیانگەیاندن بە ژێرخانی ئابووری و وزەی ناوچەکانیان.