ماوەی دوو رۆژە نرخی دۆلار بەردەوامە لە دابەزین و لە ئێستاشدا ١٠٠ دۆلار بەرامبەر بە ١٤٤ هەزار و ٩٠٠ دینارە.
دوابەدوای سەردانەکەی سەرۆک وەزیرانی عێراق بۆ واشنتۆن و ریاز نرخی دۆلار دابەزینی بەخۆیەوە بینی و لە ئێستاشدا ١٠٠ دۆلار بەرامبەر بە ١٤٤ هەزار و ٩٠٠ دینارە، لە کاتێکدایە دوێنێ یەکشەممە، لەکاتی داخستنی بازاردا ١٠٠ دۆلار بەرامبەر بە ١٤٥ هەزار و ٥٠ دینار بوو.
لەو بارەیەشەوە وتەبێژی بازاڕی دراوەکانی سلێمانی بە ئێن
ئاڕ تی راگەیاند، نرخی دۆلار دابەزینێکی بەرچاوی بەخۆیەوە بینیوە و ئەوەش کاریگەری
سەردانەکەی محەمەد شیاع سودانی سەرۆک وەزیرانی عێراق بووە و پێشبینیش دەکرێت نرخی
دۆلار لە ١٤٥ هەزار دیناردا بمێنێتەوە.
هەر ئەمڕۆ، بانکی ناوەندیی عێراق لە سەکۆی ئەلیکترۆنی
خستنەڕووی دراوە بیانییەکانەوە رایگەیاند، ئەمڕۆ بە تێکڕا ٢٧٥ ملیۆن و ٢٢٧ هەزار و
٢٦٧ دۆلاریان بە بانک و بازرگانەکان فرۆشتووە.
ئاماژەی بەوەش کرد، لەو رێژەیە ١٤ ملیۆن و ١٩٠ هەزار دۆلاری
بەشێوەی کاش بووە و ٢٦١ ملیۆن و ٣٧ هەزار و ٢٦٧ دۆلاری بەشێوەی حەواڵەی دەرەکی بووە.
شەوی رابردووش، بانکی ناوەندی
عێراق رایگەیاند، لەماوەی دوو هەفتەی رابردوودا بە هەردوو شێوەی کاش و حەواڵە نزیکی
سێ ملیار دۆلار فرۆشراوە و لەو رێژەیەش ٩٦٪ بەشێوەی حەواڵەدەرەکی بووە. ئەوەش یەکەم
جارە بانکی ناوەندی لە دوو هەفتەدا نزیکی سێ ملیار دۆلار بفرۆشێت.