٢٠٠ کۆچبەری کورد لە سنوری نێوان بیلاڕوسیا و پۆڵەندا گیریان خواردووە و دەڵێن، پۆلیسی پۆڵەندا ناهێڵێت بچنە ناو سنورەکانی ئەو وڵاتەوە و پۆلیسی بیلاڕوسیاش رێگری لە گەڕانەوەیان دەکات.
لە پەیامێکدا کە بۆ ئێن ئاڕ تییان ناردووە بەشێک لە کۆچبەرانی کورد لەناوچەی سیپۆرکای سەر سنوری و بیلاڕوسیا و پۆڵەندا گیریان خواردووە و دەڵین، چەندین رۆژە نان و ئاویان لێبڕاوە، بەهۆی توندبوونەوەی سنورەکانیشەوە جگە لە گەڕانەوە هیچ رێگایەکیان لەبەردەمدا نەماوەتەوە.
لە چەند رۆژی رابردوودا، وەزارەتی دەرەوەی عێراق رایگەیاند،
وەزیری دەرەوەی عێراق و وەزیری دەوڵەتی ئەڵمانیا بۆ کاروباری دەرەوە "رێککەوتن
لەسەر گێڕانەوەی کۆچبەرانی عێراقی کە لەسەر سنووری بیلاڕوسیا و پۆڵەندا گیریان خواردووە
بۆ عێراق بە شێوەیەکی ئارەزومەندانە"، تا ئێستاش نزیکەی ٤٣١ لە بیلاڕوسیاوە گەڕاونەتەوە
هەرێم و عێراق.
ماوەیەکە دیاردەی کۆچی هاوڵاتییانی هەرێم و عێراق بۆ بیلاڕوسیا
و دواتر بۆ پۆڵەندا و وڵاتانی ئەوروپا دەستیپێکردووە و کۆچبەران باس لەوەدەکەن، بەهۆی
سەختی ژیان و نەبوونی هەلی کار و دامەزراندن و خراپی دۆخی ئابوری و پەککەوتنی زۆرینەی
کەرتەکانی ژیان روو لەو وڵاتانە و ئەو رێگا سەختە دەکەن.
کۆچی ئەمجارەی هاوڵاتیانی هەرێم جیاوازە و بە منداڵ و گەنج
و پیرەوە لەسەر سنووری بیلاڕوسیان، لە چەند رۆژی رابردووشدا منداڵێک و مێردمنداڵێکی
١٤ ساڵ بەهۆی سەرماوە لەسەر هەمان سنور گیانیان لەدەستدا.