دوای ئەوەی لە ساڵی ١٩٧٩، رژێمی بەعس تەواوی ھۆز و تیرەکانی سەر بە بارزان، وەک بەڕۆژی، نزاری، مزووری، شێروانی، دۆڵەمەری، گەردی و ھەرکی بەمەبەستی کپکردنی ھەستی نەتەوایەتیی و بێدەنگکردنی ھاواری کوردایەتی، بۆ کۆمەڵگە زۆرەملێکان گواستەوە، لە ھاوینی ساڵی ١٩٨٣، رژێمی بەعس ھەڵمەتێکی رەشبگیری لە ھەریەک لە کۆمەڵگەکانی دیانا، ھەریر، بەحرکە و قوشتەپە دەست پێکرد و لەو ھەڵمەتەدا ھەشت ھەزار بارزانی بێتاوانی ئەنفالکرد و بە ھەزاران ئافرەت و منداڵیش بێ سەرپەرشت مانەوە.

پلانی ئەنفالکردنی خەڵكی كوردستان لەلایەن رژێمی بەعسەوە لە ساڵی ١٩٨٣ دەستیپێکرد و ئەمە دەستپێكی شاڵاوێكی گەورەتری حزبی بەعس بوو كە ئامانجی لەناوبردن و قڕكردنی نەتەوەیەك بوو، لە ئەنجامی ئەو شاڵاوەدا زیاتر لە ١٨٢ هەزار كورد بوونە قوربانی، جگە لەوەش نزیکەی چوار هەزار و ٥٠٠ گوند و شارۆچکەش رووخێندران، سەرجەمی ئەو تاوانانەش بە بەڵگە سەلمێنران و لە کاتی بەڕێوەچوونی دادگەکانی تاوانباران لە سەرانی بەعس وەک بەڵگە دانپێدانی لەسەر کرا.

بەپێی ئامارەکانی پێشووی وەزارەتی کاروباری شەهیدان و ئەنفالکراوانی کوردستان، تاوەکو ئێستا سێ قۆناغی هێنانەوەی رووفاتی بارزانییەکان هەبووە، ئەوانیش قۆناغی یەکەم ساڵی ٢٠٠٥ بوو کە ٥٠٣ رووفات، قۆناغی دووەم ساڵی ٢٠١٤ بوو کە ٩٣ رووفات و قۆناغی سێیەم ساڵی ٢٠٢٢ بوو تێیدا ١٠٠ رووفات گەڕێنرانەوە، بەمەش تەنیا رووفاتی ٦٩٦ ئەنفالکراو هێنراوەتەوە، هێشتا رووفاتی زیاتر لە حەوت هەزار بارزانی لە خوارووی عێراق ماون.