بانکی ناوەندی رایگەیاند، لە کۆبوونەوەی نێوان شاندی بانکی ناوەندی عێراق لەگەڵ تورکیا بڕیاردرا ئاڵوگۆڕی بازرگانی لە دۆلارەوە بگۆڕێت بۆ دینار و یۆرۆ و لیرە لە نێوان هەردوو وڵاتەکەدا.
ئەمڕۆ شەممە، نوسینگەی راگەیاندنی بانکی ناوەندی عێراق لە راگەیەندراوێکدا بڵاوی کردەوە، کۆبوونەوەی شاندی باڵای بانکەکانی عێراق و بانکی ناوەندی بە سەرپەرشتی عەلی عەلاق، پارێزگاری بانکی ناوەندی تەواوبووە و لەگەڵ هاوتا تورکییەکانیان لەسەر گۆڕینی مامەڵەی بازرگانی لە دۆلارەوە بۆ لیرەی تورکی رێکەوتن.
ئاماژە بەوەش
کراوە، بەپێی رێککەوتنی نێوانیان لەمەودوا لە مامەڵە بازرگانییەکانی نێوان هەردوو
وڵات لە ناوخۆی عێراقدا دینار و لە تورکیا
لیرەی تورکی و یۆرۆ بەکاردەهێندرێت.
باس لەوەش
کراوە، بەپێی ستانداردی سیستمی ئەلیکترۆنی جیهانی بە ئامانجی پاراستن و سەقامگیری
سیستمی پارەدارکردن و بەهای دراوەکان، ئاسانکاری لە ئاڵوگۆڕی ئەلیکترۆنی بۆ گەشتیاران
لە سنوری هەردوو وڵاتەکەدا دەکرێت.
ئەوەش
خراوەتە روو، یەکێک لە تەوەرەکانی دیکەی کۆبوونەوەکە گفتوگۆکردن بووە لەسەر
بەکارهێنانی سیستەمێکی دارایی نوێ بۆ بەدەستهێنانی
سەقامگیری گشتی لە بەهای دراوەکاندا ئەوەش لەڕێگەی چاودێریکردنی مامەڵەی هاوردەکردن
بە نرخی فەرمی بانکی ناوەندی.
ئەوەش لە
کاتێکدایە، لە ماوەی رابردوودا مه‌زهه‌ر محه‌مه‌د ساڵح راوێژكاری دارایی محه‌مه‌د
شیاع سودانی سه‌رۆك وه‌زیران رایگەیاند، پلانی سودانی كۆتاییهێنانە به مامه‌ڵه‌كردن
به دۆلار له ناوخۆی عێراق و به‌رزكردنه‌وه‌ی ئاستی دینار.