میدیا عەرەبییەکان رایانگەیاند، لەسەر رێگەی سەرەکی سەفوان – ئوم قەسڕ لە بەسڕە پاسێک و بارهەڵگرێک بەیەکیاندا کێشاوە و بەهۆیەوە ١٤ کەس گیانیان لەدەستداوە.
ئەمڕۆ سێشەممە، شایەتحاڵێک بە ئاژانسی بەغداد ئەلیەومی راگەیاندووە، لەسەر رێگای سەرەکی سەفوان – ئوم قەسڕ لە پارێزگای بەسڕە بارهەڵگرێک بەهۆی خێراییەوە کۆنترۆڵی لەدەستداوە و خۆی کێشاوە بە پاسێکدا و لە ئەنجامدا ١٤ سەرنشین گیانیان لەدەستداوە.
ئاماژەی بەوەشكرد،
لەو کەسانەی گیانیان لەدەستداوە ١٠ مامۆستا و ٤ منداڵ بوون کە دەچوون بۆ قوتابخانە
و تەرمەکانیان رەوانەی پزیشک دادی بەسڕە کراوە بۆ توێکاری، ئەوەش هاتووە، شۆفێری
بارهەڵگرەکەش بریندارە و رەوانەی نەخۆشخانە کراوە.
لە ئێستاشدا، تیمەکانی
هاتوچۆ و لایەنە پەیوەندیدارەکان لێکۆڵینەوەیان لە چۆنییەتی و شێوازی رووداوەکە دەستپێکردووە.
ئەمەش لە کاتێکدایە،
لە پارێزگاکانی عێراق لە ماوەی ١٠ مانگی رابردوودا زیاتر لە حەوت هەزار و ٣٢٣
رووداوی هاتوچۆ تۆمارکراون، کە بەپێی وتەی هاتوچۆ، رێژەی ٪٧٠ـی رووداوەکان بەهۆی تیژڕەوی
و بەکارهێنانی مۆبایلەوە بووە.