وەزارەتی خوێندنی باڵای حکومەتی هەرێمی کوردستان راگەیەندراوێکی بڵاوکردەوە و دوو بڕیاری بۆ تەواوی زانکۆ حکومی و تایبەتییەکان دەرکردووە لەدوای رووداوەکەی ئەمڕۆ زانکۆی سەلاحەدین کە راگری کۆلێژی یاسا و مامۆستا لە کۆلێژی ئەندازیاری زانکۆی سەلاحەدین لەلایەن کەسێکەوە کوژران.
لە راگەیەندراوەکەدا ئاماژە بەوەکراوە، وەزارەتی خوێندنی باڵا بڕیاری داوە بە داگرتنی ئاڵای وەزارەتی خوێندنی باڵا و زانکۆ و دامەزراوەکانی سەر بە وەزارەتی خوێندنی باڵا و توێژنەوەی زانستی بۆ ماوەی سێ رۆژ.
ئاماژە بەوەشکراوە، پێویستە سەرجەم چالاکییە زانستی و مەراسیم و بۆنە و ئاهەنگەکانی
دەرچوون لە سەرجەم زانکۆکان رابگیرێن.
ئەمە لەکاتێکدایە، کاتژمێر ٨ و ٣٠ خولەکی ئەمڕۆ، ئاراس مەهدی، لە کۆلیژی یاسای
زانکۆی سەڵاحەدین چووە سەر کاوان ئیسماعیل راگری کۆلێژەکە و پێنج گولـلەی پێوەدەنێت
و بەسەختی برینداری دەکات، دوای ئەوەی پێشتر پاسەوانێکی کۆلێژەکەی بریندارکردبوو.
دوای گەیاندنی راگری کۆلێژی یاسا بە نەخۆشخانەی ئێمرجینسی هەولێر لەبەر سەختی برینەکەی
گیانی لەدەستدا.
هەر ئەمڕۆ، پێشتر ئاراس مەهدی، دەچێتە سەر ماڵی نیشتیمان عوسمان، بەڵام بەهۆکاری
ئەوەی لەماڵ نابێت بە گولـلە ئیدریس عیزەتی مێردی، کە مامۆستابووە لە کۆلێژی ئەندازیاری
لە زانکۆی سەڵاحەدین دەکوژێت.
دوا بەدوای رووداوەکە، چاوگێک لە ئاسایشی هەولێر بە ئێن ئاڕ تی راگەیاند،
توانیویانە لە نزیک گوندی کانی بزرە و مورتکە دەستگیر بکەن کە هەوڵیداوە لەسنوری هەولێر
بچێتە دەرەوە.
ل.ل