سەردێڕ:

نێچیرڤان بارزانی ڕاست دەکات!

11/20/2019 4:25:08 PM
19500 جار خوێندراوەتەوە
عەبدوڵای مەلا نوری
+ -

نێچیرڤان بارزانی دەڵێت: بەغدا قوڵایی ستراتیجی ھەرێمی کوردستانە.
لە راستیدا من ئەم قسەیەم ھەم پێ خۆشە، ھەم بە راستیشی دەزانم! بەڵام ئەگەر ئەم قسەیە لایەنێکی تر بیکردایە یەکسەر تەخوین دەکرا و بە کرێگرتەی بەغدا لە قەڵەم دەدرا، لەم روەوە نموونە زۆرە.
قوڵایی ستراتیجی پەیوەستە بە پێگەی جوگرافی و مێژوو و ئاسایش و سەقامگیری و بەرژەوەندی ھاوبەشەوەو ئەم برادەرانە ھەر لە بنەمادا دیدێکی واقعی و ستراتیجیان نیە، بەڵکو بە گوریسی بەرژەوەندیە تایبەتیەکانی خۆیان قوڵایی ستراتیجی دیاری دەکەن و لە ناوئاخنی دەستووری عێراقیدا ئەو قوڵاییە ستراتیجیەی کە نێچیرڤان بارزانی باسی دەکات رەنگی داوەتەوە.
دەسەڵاتدارانی کوردی بۆ ئەوەی ئەو قوڵاییە ستراتیجیە بپارێزن و زیاتر بیخەنە خزمەت بەرژەوەندیە کورت مەودا و درێژمەوداکانی ھەرێمەوە، دەبوو لە رابردوودا لە ھەموو لایەک زیاتر مشووری جێبەجێکردنی دەستوری عێراقی فیدراڵیان بخواردایە.
بەڵام ئەوەیان نەکرد، بەڵکو بە مەبەست لێگەڕان لایەنە عێراقیەکان دەستور پێشێل بکەن، بۆ ئەوەی ئەمانیش لە دەرەوەی دەسەڵاتە دەستوریەکانی ھەرێمەوە، ھەندێک ھەنگاو لە چوارچێوەی بەرژەوەندیە بازرگانی و سیاسیە حیزبی و بنەماڵەیی و کەسیەکانی خۆیاندا بنێن و کردیان.
 مەسەلەن ئەو کاتەی بەرھەم ساڵح سەرۆکی حکومەت بوو، نێچیرڤان بارزانی بە بێ ئەوەی ھیچ پۆستێکی حکومی رەسمی ھەبێ چەند جارێک سەردانی ئەنقەرەی کرد و لاوازی کابینەکەی دکتۆر بەرھەمی قۆستەوەو بناغەی رێکەوتنی ٥٠ ساڵەی نەوتی نێوان تورکیا و ھەرێمی دانا.
لەم پرسە ھەرە مەترسیدار و ستراتیجیەدا ئەوەی حسابی بۆ نەکرا بەغدا بوو، وەک قوڵایی ستراتیجی ھەرێمی کوردستان، (ئەم ھەڵە ستراتیجیە لە ریفراندۆمیشدا دووبارە کرایەوە).
لە راستیدا ئەم برادەرانە بەس قسە فڕێ دەدەن، بە بێ ئەوەی دیدێکی واقعی و ستراتیجیان ھەبێ، ئەسڵەن برواشیان پێی نیە، باشترین بەڵگەش ئەوەیە حکومەت و دەسەڵاتدارانی ھەرێم ھێشتا ئامادەنین نەوتی ھەرێم لە رێگەی عێراقەوە بفرۆشرێت، لە کاتێکدا ھەم نرخەکەی و قازانجەکەی زیاترە، ھەم گەرەنتی ھاتنی موچەی فەرمانبەرانی ھەرێم لە بەغداوە دەکات و دەشێت سەرەتایی دروستکردنەوەی متمانەی نێوان ھەولێرو بەغداش بێت.
کەواتە ئەمانە باکیان نیەو نیگەران نین لەوەی لە داھاتوودا جارێکی تر موچەی خەڵک ببڕێت و گورزێکی تری ئابوری بەر ھەرێم بکەوێت و ئەو شڕە سەقامگیریەشمان زیاتر تێک بچێ!؟
ئەمانە لەو مەحفەلانەی کە خەڵکی بێگانەی تێدا دانیشبێت و کامێرای تەلەفزوێنەکان راستەوخۆ بۆیان بگوازێتەوە، میکایجێکی کوالێتی بەرزی بۆ دەکەن و ئیدی قسەی خۆش و گەورەیان بۆ دێت.
ئەمانە، پاش دەیان کۆبونەوە و لە کاتێکدا کە ناوچە کێشەلەسەرەکان (بە قسەی خۆتان لە ژێر ھەرەشەی جدیدایە) نەتوانن پارێزگارێکی کورد لە کەرکوک دابنێن و نەتوانن قوڵایی ستراتیجی ھەرێم کوردستان لەو ناوچانە کوردستانیانە بپارێزن، کوا لە خەمی ھەرێم و قوڵاییە ستراتیجیەکەیدان؟!
مانەوەی ئەم حکومڕانیە فشەڵەی ئێستای ھەرێم، لە سایەی دەزگای ھەواڵگری حزبی و پێشمەرگەی حزبی و ئابوریەکی دزراو و قورخکراو لە لایەن حیزبەوە...ھتد، ستراتیجی نێچیرڤان بارزانی و حکومڕانانی تری ھەرێمە.
کەچی لە بەیان و رێکەوتنە حیزبیەکانیاندا لە سەر دۆخی شارەکانی ناوەڕاست و خوارووی عێراق داوای سەربەخۆی دادگا و شەفافیەت و بە دەنگەوەچونی خواستەکانی خۆپیشاندەران دەکەن!
لە کۆتایدا دەمەوێ ئەوە بڵێم: ستراتیجێک خۆی تۆکمەو سەلیم بێت دەتوانێ قوڵایی ستراتیجی سەلیم بۆ خۆی دروست بکات، خۆ ئەگەر ستراتیجەکە لە ناو خۆیدا فشەڵ بوو، ئەوا ئەگەر ھەمو چوار دەوریشی قوڵاییەکی ستراتیجی کۆنکریتی بێت لە ئەنجامدا ستراتیجەکە کە ھەرێمی کوردستانە لە ھەمو ئانوساتێکدا لە بەردەم ئەگەری لە ناوچوونە!
رەنگە باشترین نمونەش ئەوە بێت ئێران ساڵانێکە لە وڵاتانی دەرەوە خەریکی تۆکمەکردن و پاراستنی قوڵاییە ستراتیجیەکەیەتی، بەڵام لە ناوخۆدا بە ئیھمالکردنی "ژیانی خەڵک" کە کرۆکی ستراتیجی دەوڵەتە، بۆیە وا خەریکە ھەم ناوخۆی لە دەست دەچێت، ھەم قوڵاییە ستراتیجیەکەی کە خۆی لە چەند پایتخەتێکی وڵاتانی ناوچەکەدا دەبینێتەوە.