پاش بڵاوبوونەوەی بەرهەمێکی نوێی هەڵکەوت زاهیر؛ ژمارەیەک بەکارهێنەری تۆڕەکۆمەڵایەتییەکانی هەرێم نارەزایەتییان بەرامبەر ئەو کارە دەربڕی و داوایان لە وەزیری پەروەردە کرد "سنوورێک بۆ ئەم جۆرە بەرهەمانە دابنێت"، وەزیری پەروەردەی هەرێم وەڵامیداونەتەوە و دەڵێت، لەگەڵ وەزارەتی رۆشنبیری قسەدەکەن. 

لە تۆڕە کۆمەڵایەتییەکانەوە داوادەکرێت کە هەردوو وەزیری ڕۆشنبیری و پەروەردە بێنە دەنگ و ڕێگە بە کاری لەم جۆرە نەدرێت و بووەستێندرێت، ئەو بەکارهێنەرانە گۆرانییەکە بە "ناهونەری و پڕ سوکایەتی" ناودەبەن.

ئالان حەمە سەعید وەزیری پەروەردەی هەرێم لە کۆمێنتی پۆستی لاپەڕەیەکی کۆمەڵایەتی کە داوای دانانی سنووریان بۆ ئەو گۆرانیانە کردبوو نووسیویەتی، "سڵاو، گەیشت و لەگەڵ وەزارەتی ڕۆشنبیری قسە دەکەین".

لەبەشێکی دیکەی نوسراوەکەی فەیسبووکدا هاتووە، "ئەگەر ئەم ئاگرە خامۆش نەکرێت و دانەمرکێتەوە، لە دواڕۆژدا دەبێتە سوتانی خەرمانی چەندین ساڵەی ژێرخانی پەروەردە و هونەری،کاریگەری خراپ جێدەهێڵێت لەسەر ئیدراکی و هزری نەوەی ئایندە و مێژوویی هونەریمان".

ئاماژە بەوەشکراوە، "پێویستە ڕێکاری یاسایی بگرینەبەر و سزای هەڵسوڕاوانی ئەم کارە بدەین و بیانوەستێنینو گۆرانییەکی تەواو بێسەروبەرە و بێ تێکست و بێ مۆڕاڵی گشتی و فلتەرە، فیگەرەکانی ناو گۆرانییەکە پڕن لە قسەی شەقام و بێ فلتەر، پڕن لە قسەی سواو و لاوەکی، لە ئاستێکی زۆر نزمی کلیپکردن و شانۆیی، ئامانج تەنها بێحورمەتکردنی مامۆستا و خوێندکارە و گاڵتە پێکردنە بە خودی مامۆستایان و حەرەمی قوتابخانە و خوێندکار و سەرجەم کایەکانی ڕۆشنبیری و فەرهەنگی و کلتوری کۆمەڵگەکەمان".

گۆرانییەکە کاری هەڵکەوت زاهیرە و هەریەک لە هونەرمەندان (میرا، د.بەلقیس، ئیدریس، بەشیر، گەیلان، کاکە، ئیلایدا مەتین) تێیدا گۆرانی دەڵێن و دەرکەوتوون .

گۆرانییەکە شەوی ڕابردوو لە پێگەی فەرمی هەڵکەوت زاهیر بڵاوکرایەوە و ئاوازی گۆرانیەکە لەلایەن هەڵکەوت زاهیرەوە دانراوە و نەوژین سۆران تێکستەکەی نوسیوە، بڵند سۆران کاری دەرهێنانی بۆ ڤیدیۆکلیپەکە کردووە.