زۆرینەی جەستەی مرۆڤ لە ئاو پیک هاتووە و ڕێژەیەکەی زۆری تێدایە، سییەکان ٪٨٥ یان ئاوە و مێشک و دڵ ٪٧٣ی ئاوە و ئێسکەکان ٪٣٢یان، شارەزایان باسیان لەوەکردووە کە خواردنەوەی بڕی پێویستی ئاو وا لەجەستە دەکات تەندروست بێت و دژی نەخۆشییەکان بێت.

ماڵپەڕی بڕاید سایت لە هەواڵیکدا باسی لەوەکردووە کە خواردنەوەی بڕی پێویستی ئاو بەشێوەی ڕۆژانە سوودێکی زۆری هەیە بۆ جەستە و سوودەکانیشی ئەمانەن:

یەکەم: بەستەری نێوان ئێسکەکان بەهێز دەکات و لینجیان پێ دەبەخشێت و ئەمەش ئازاری جومگەکان کەمتر دەکاتەوە.

دووەم: هەوکردنی میزەڵدان و بەردی گورچیلە ناهێڵێت، گورچیلە هەموو شتە ناپێویستەکانی ناو خوێن دەپاڵێوێت هەربۆیە کاتێک بڕی پێویستی ئاو نەخورێتەوە ئەو ترشەکان زیاتر دەبن و ئەمەش وادەکات توشی کێشە ببیت لە گورچیلەکانتدا.

سێیەم: بارودۆخی دەروونی و بیرەوەری و توانای سەرنجدانت زیاتر دەکات و کارەکانی مێشک باشتر دەکات، تەنانەت کاریگەری هەیە لەسەر کەمکردنەوەی سەرئێشە.

چوارەم: تەندروستی دڵ بەرەو پێش دەبات، هەر کاتێک بڕی پێویست ئاو بخۆیتەوە ئەو کاتە دڵت باشتر کار دەکات و بەوشێوەیەش فشار لەسەر دڵت کەمدەبێتەوە و دڵت بەشێوەی دروست کار دەکات.

پێنجەم: بەدوور دەبیت لە سەرئێشەی کاتی، توێژینەوەیەک ئەوەی سەلاماندووە کە خواردنەوەی بڕی پێویستی ئاو کاریگەری دەبێت لەسەر کەمکردنەوەی سەرئێشە بەڕێژەی ٪٤٧.

شەشەم: ڕەنگە ئەم خاڵە هەندێک کەس بە خاڵێکی نەرێنی بیبینن بەڵام مانای تەندروستییە، کە بریتییە لە چوونە توالێت زیاتر لەو کەسانەی کەمتر ئاو دەخۆنەوە چونکە ڕێژەی کانزاکانی جەستە ڕێک دەخات و میکانیزمەکان باشتر دەکات.