دڵ سەرچاوەی سەرەکی وزەی جەستەیە، بەشێکی زۆری خەڵکی پرسیاری ئەوە دەکەن کە چۆن بزانین دڵمان تەندروستە؟، پسپۆران دەڵێن ئەم نیشانانە ئاماژەن بۆ ئەوەی کە دڵت تەندروستە.

لە ڕاپۆرتێکی ماڵپەڕی " Times of India"دا، باس لە دیارترین ئەو نیشانانە کراوە، ئەوانیش بریتین لە:

١.لێدانی دڵ بەشێوەیەکی رێک و جێگیر:

لێدانی دڵی بەشێوەیەکی ئاسایی لە نێوان ٦٠ بۆ ١٠٠ لێدانە لە خولەکێکدا، لێدانی دڵی کەسێک لە کاتی پشووداندا کەمترە لە نێوان ٥٠ بۆ ٦٠ لێدانە لە خولەکێکدا.

٢. پاکوخاوێنی دەم و ددان:

پووک دەتوانن زۆر شت دەربارەی دڵت دەربخەن، تەندروستی پووک و ددان دەتوانێت نیشانەیەکی تەندروستی دڵ بێت چونکە نەخۆشی پووک پەیوەندی بە نەخۆشییەکانی دڵەوە هەیە، کێشەکانی دڵ لە کۆتاییدا دەتوانن لە هەوکردنی دەم و ددانەوە سەرچاوە بگرن کە بۆ خوێنبەرەکان بڵاودەبێتەوە.

٣. پەستانی خوێن لە ژێر کۆنتڕۆڵدایە:

ئاستی ئاسایی پەستانی خوێن ئاماژەیە بۆ ئەوەی دڵ و خوێنبەرەکانت بە باشی کاردەکەن، دابەزینی پەستانی خوێن کاریگەری لەسەر دابینکردنی ئۆکسجین بۆ ئەندامەکانت دەبێت، بەڵام بەرزی پەستانی خوێن فشاری زیاتر دەخاتە سەر دڵت. پاراستنی پەستانی خوێنی ئاسایی کلیلی تەندروستی دڵت و کەمکردنەوەی مەترسی تووشبوونت بە نەخۆشییەکانی دڵە.

٤. ئاستی کۆلیسترۆڵ:

ئاستی بەرزی کۆلیسترۆڵی باش(HDL) و ئاستی نزم لە کۆلیسترۆڵی خراپ(LDL) ئاماژەیە بۆ ئەوەی کە ئەگەری گیرانی خوێنبەرەکانمان کەمترە، ئەمەش ئەگەری تووشبوون بە نەخۆشییەکانی دڵ کەمدەکاتەوە.

٥. ڕێژەی چاکبوونەوەی هەناسەدان دوای وەرزشکردن:

ئەو خێراییەی کە دوای چالاکیی جەستەیی هەناسەمان دەگرین، دەتوانێت زۆر شت دەربارەی تەندروستی دڵمان ئاشکرا بکات، ڕێژەی چاکبوونەوەی خێراتر نیشانەیە بۆ ئەوەی دڵ و سییەکانمان بە باشی کاردەکەن، ئەمەش ئاماژەیە بۆ ئەوەی دڵمان توانای ئەوەی هەیە بە شێوەیەکی کارا خوێنی دەوڵەمەند بە ئۆکسجین بۆ ماسولکە و ئەندامەکانمان دابین بکات، ڕێژەی هەناسەدانی ئاسایی لە ماوەی یەک یان دوو خولەک دوای ماندووبوون دەردەکەوێت.