پسپۆڕێکی تایبەت بە نەخۆشییەکانی ژنان ئاشکرایکردووە، خانمان لە هەموو تەمەنەکاندا تووشی ئازاری مەمک یان مەمک ئێشە دەبنەوە، کە گرفتێكە و دەکرێت لە پێش یان لەدوای ماوەی بێهیوایی دروستببێت، بەڵام بە زۆری لە خانمانی گەنج زیاترە و یەکێک لە گرفتەکانی ئازاری مەمکیش ئەوەیە کە زۆربەی خانمان شەرم دەکەن لای پزیشك و دایک و تەنانەت خوشکەکەشی باسی بکەن.

ژیان خەلیل ئەحمەد پسپۆڕی نەخۆشییەکانی مەمک ڕایگەیاندووە، هەرچەند لە %٧٠ی خانمان تووشی مەمکئێشە دەبن لە یەکێك لە کاتەکانی تەمەنیان، بەڵام لەو رێژەیە تەنیا %١٥یان پێویستیان بە چارەسەری پزیشكی دەبێت.

ئەو پسپۆرە کۆمەڵێک هۆکاری خستووەتە ڕوو کە دەبنەهۆی مەمکئێشە، ئەوانیش:

یەکەم: کیسی مەمک

مەمکی خانمان کۆمەڵێک قەبارە و شێوازی جیاوازی هەیە و مەترسیی دروستبوونی ئازاری زیاترە، لەکاتی دروستبوونی رژێن و جۆگەکانی شیر گواستنەوە لەنێو مەمکدا، مەترسیی دروستبوونی کیسەکانی مەمک زیاد دەکات.

دووەم: دەرمان

کۆمەڵێک دەرمان هەن کە ئازاری مەمک دروستدەکەن، لەوانە:

- دەرمانەکانی نەزۆکی.

- هۆڕمۆنەکانی رێگریکردن لە منداڵبوون.

-ئیسترۆجین و پڕۆجیسترۆن لەدوای تەمەنی بێهیوایی.

-دەرمانەکانی خەمۆکی

-دەرمانەکانی میزکردن

سێیەم: نەشتەرگەریی مەمک

ئەنجامدانی نەشتەرگەریی و دروستبوونی برین و مانەوەی شوێنەواری برین هۆکارە بۆ ئازاری مەمک.

چوارەم: هەوکردنی شانە کڕکڕاگەییەکان

هەوکردنی شانە کڕکڕاگەییەکان کە پەراسووەکان بەیەکەوە دەبەستێتەوە، هەرچەندە ئەمە پەیوەندیی بە مەمکەوە نییە، بەڵام زۆربەی خانمان بۆیان جیاناکرێتەوە.

پێنجەم: هەوکردنی مەمک

چەند حاڵەتێکی بە ئازارن، زیاتر تووشی خانمانی شیردەر دەبن بەهۆی مانەوەی شیر هەوکردن روودەدات و زۆرجار لەگەڵیدا ئازار، تا بێهێزی و ئەستووربوونی مەمک روودەدات.

شەشەم: ستیانێکی ناڕێک

بەکارهێنانی ستیانی زۆر تەسک، یان زۆر شل پاڵپشتی مەمکەکان لاواز دەکات و بەمەش ئازار دروستدەکات.

حەوتەم: شێرپەنجەی مەمک

زۆربەی حاڵەتەکانی شێرپەنجەی مەمک بێ ئازارن، بەڵام لە هەندێكیان ئازار و ناڕەحەتی دروستدەکات و پێویستیان بە پشکنین دەبێت.

ژیان خەلیل لە کۆتاییدا ڕونیکردووەتەوە، پێویستە خانمان هۆشیاربن و لەکاتی دروستبوونی ئازار سەردانی پزیشكی تایبەتی خۆیان بکەن، تاکو لە هۆکارەکەی دڵنیاببنەوە کە دەکرێت یەکێك لەمانەی سەرەوە بێت.