دانیشتوانی جیهان چاوەڕوانی دیاردەیەکی فەلەکی ناوازە دەبن، لە شەوی ٧ تا ٨ی ئەیلوولی ٢٠٢٥دا مانگگیرانێکی دەگمەنی تەواوەتی روودەدات کە درێژترین مانگگیرانە لە ساڵدا.

بەگوێرەی داتاکانی "global petrol prices"، زیاتر لە شەش ملیار کەس لە ئاسیا و ڕۆژئاوای ئوسترالیادا، کە دەکاتە 77%ی دانیشتوانی جیهان، دەتوانن شایەتحاڵی تەواوی مانگگیرانەکە بن، لە کاتێکدا دانیشتوانی وڵاتانی ئەوروپا، ئەفریقا، ڕۆژهەڵاتی ئوسترالیا و نیوزلەندا بەشێک لە مانگگیرانەکە دەبینن، بەڵام دانیشتوانی ئەمریکا ناتوانن بیبینن.

کۆی گشتی مانگگیرانەکە ٨٢ خولەک دەخایەنێت، بەمەش دەبێتە یەکێک لە درێژترین مانگگیرانەکانی ئەم دەیە، ئەم دیمەنە فەلەکناسییە بە دیاردەیەکی ناوازە و تایبەت باس دەکرێت.

مانگ بە سووری تۆخ دەردەکەوێت کاتێک تیشکی خۆر بە بەرگەهەوای زەویدا تێدەپەڕێت و بەرەو مانگ دەشکێت، ئەمەش دیاردەیەکە بە "مانگی خوێن" ناسراوە، ئەم دیمەنە زیاتر بەرزتر دەبێتەوە بەهۆی قووڵی ڕێژەیی مانگگیرانەوە، سێبەری زەوی نزیکەی 36%ی تیرەی مانگ دەگرێتەوە.

ڕۆژهەڵاتی ناوەڕاست و ئاسیا لە باشترین ناوچەکان دەبن بۆ بینینی ئەو دیاردەیە، لێرەدا دیارترین کاتەکان لە چەند شارێکدا دەخەینەڕوو:

قاهیرە، ڕیاز، بەغدا، بەیروت، دیمەشق، عەمان: کاتژمێر ٨:٣٠ شەو تا ٩:٥٢ شەو

پەکین و هۆنگ کۆنگ: کاتژمێر ١:٣٠ بەیانی تا ٢:٥٢ بەیانی

تۆکیۆ: کاتژمێر ٢:٣٠ بەیانی تا ٣:٥٢ بەیانی

سیدنی: کاتژمێر ٣:٣٠ بەیانی تا ٤:٥٢ بەیانی

مۆسکۆ: کاتژمێر ٨:٣٠ی شەو تا ٩:٥٢ی شەو

ئەستەنبوڵ: کاتژمێر ٨:٣٠ شەو تا ٩:٥٢ شەو

لەندەن: کاتژمێر ٦:٣٠ی ئێوارە تا ٧:٥٢ی ئێوارە

شارەکانی وەک کازابلانکا و تونس و جەزائیر تەنها لە قۆناغە سەرەتاییەکان یان کۆتاییەکانیدا شاهیدی مانگگیرانەکە دەبن.