ئامادەکردنی یاپراخی سڵق بە پەراسوو

2021-05-12

3057 جار خوێندراوەتەوە

+ -

یاپراخی سڵق یەکێکە لە جۆرە باوەکانی خواردن کە بۆ بۆنە و سەیران زیاتر ئامادە دەکرێت، لێرەدا ئاماژە بە چۆنێتی ئامادەکردنەکەی دەکەین:

پێداویستییەکان:

دوو دەسک سڵق

سێ پەرداخ برنج

سێ پەرداخ ئاو

دەسکێک کەرەوز

سێ سەلک پیاز

دوو باینجان

 دوو کولەکە

نیو کیلۆ پەراسوو

پەتاتە و گێزەر بەپێی پێویست

سێ کەوچک دۆشاوی تەماتە

دوو بیبەری شیرین

دوو تەماتە

بەهاراتی یاپراخ

پاقلە یان لۆبیا بەپێی ئارەزوو

ئاوی نیولیمۆ

ئامادەکردنەکەی:

پاقلە یان لۆبیاکە دەکوڵێنیت و زەردی دەکەیت، دواتر لە بنی ئەو مەنجەڵەی بۆ یاپراخەکە دانراوە دایدەنێین، دواتر لاسکی سڵقەکەی دەکەینە سەر.

پەراسوی ئاژەڵەکە سوردەکەینەوە و دواتر کەمێک ئاو و خوێی تێدەکەین تاکو دەکوڵێت.

گەڵای سڵقەکە ئامادە دەکەین و دەیشۆینەوە لەگەڵ سەرجەم پێداویستیەکانی دیکە، دواتر تەماتە و کولەکە و باینجانەکە ناوەکەی هەڵدەکۆڵین لەگەڵ پیاز و بیبەرەکە و سوری دەکەینەوە، پێکهاتەکانی ناواخنەکەی بەجیا سوردەکەینەوە، دواتر کەرەستەکانی تر بە جیا سوردەکرێنەوە جگە لە تەماتەکە.

برنجەکە بشۆرەوە و لە دەفرێکی گەورەدا دایبنێ خوێ وئاوی لیمۆ و بەهارات و دۆشاوی تەماتەکەی بکە بەسەردا و تێکی بدە، پاشان ناوی هەموو پێکهاتەکان کە سورکراوەتەوە لەگەڵ تەماتەکە بکە بەسەریدا و تێکەڵی بکە.

 

 

گەڵاکان لەگەڵ تێکردنی برنجەکە بپێچەرەوە، دوای چینێک لە گەڵاکە پەراسووەکەی تێبکە، چینەکەی تری کولەکە و باینجان و تەماتە و بیبەرەکەی تێبکە، چینی کۆتایی سڵق بێت، ئەو لاسکەی گەڵاکان کە ماوە بیکەرە سەرەکەی.

لە کۆتاییدا ئاوەکە بکەرە ناو مەنجەڵەکەوە و قاپێکی پان بخەرە ناوی بۆئەوەی یاپراخەکان هەڵنەوەشێت، پاشان سەری مەنجەڵەکە داپۆشە، دوای نیو کاتژمێر ڕۆنی تێبکە و دووبارە سەری داپۆشەرەوە و ئاگرەکەی کز بکە، دوای کوڵاندنی لەگەڵ سەوزە و نان و دۆ پێشکەشی بکە.