سەردێڕ:

سیناریۆ‌و چیرۆكە ترسناكەكانی دەزگای هەواڵگری!

PM:02:57:16/09/2021
6228 جار خوێندراوەتەوە
مەریوان عەلی
+ -

ئازادی؛ كێشە بونیەویی و ئەزەلییەكەی مرۆڤ، وەك پرسیارێكی قوڵی فرە رەهەند، هێشتا وەڵامی گەورەی گەرەكە!
بەخوێندنەوەی بیرەوەرییەكانی ئیعتیماد خورشید، یەكێك لەپرسیارە هەرە گەوهەرییەكان كە دەتهەژێنێ‌، ئەوەیە كە چین و كێن ئەوانەی ئازادییەكانمان زەوت دەكەن؟ كامە دروشم‌و سیاسەت، كامە ئایدۆلۆجیاو بیروڕا، كامە یاساو پرەنسیپ، رەوایەتی بەئەسیركردنی مرۆڤەكان دەدات؟! رۆسۆی فەیلەسوف-یش، سەردەمانێك زووتر پرسیویەتی: مرۆڤ كە بەئازادی دێتە بوونەوە، چی‌و كێ‌ مافی بەوانی دی بەخشیوە، ئازادییەكەی لێزەوت بكەن؟!

كۆنتڕۆڵكردنی ژیان، تاڵانی ‌و گەندەڵی لەئەرزو ئاسمان، دیلی‌و ئەسیركردن، بڕیاری بوون‌و نەبوون، لەلایەن ئەوانی ترەوە، ستراتیجی زاڵی سەردەم‌و دەردو پەتایەكی نەفرەتیشە بۆ رۆژهەڵات، باوەڕیشم نییە لەئێخەی مرۆڤی كورد ببێتەوە! هەر بۆیە دێڕ بەدێڕی بیرەوەرییەكانی ئیعتیماد خورشید (شاهێدحاڵێك، لەسەر لەڕێلادانەكانی سەڵاح نەسر- شاهدە علی انحرافات صلاح نصر) زوخاوی لێدەچۆڕێ‌، زوخاوی چیرۆكە تاوانكارییەكانی (سەڵاح نەسری)ی سەرۆكی دەزگای هەواڵگریی میسر، لەساڵانی (1957-1967)دا.

ئیعتیماد، ژنێكی خاوەن مێردو دایكی دوو منداڵ، خاوەن كۆمپانیایەكی بەرهەمهێنانی فیلم لەمیسری هۆلیودی عەرەب، بەو دێڕەی (بەڵی، مافی گەلە هەموو شتێك بزانێت)، گێڕانەوەو شاهێدحاڵییەكانی دەستپێدەكات.

بەجۆرێك چوار ساڵی ژیانی خۆی لەگەڵ سەڵاح نەسر دەگێڕێتەوە، مرۆڤ؛ توشی شۆك و ئازارێكی دەروونی گەورە دەكات.

ئەو، لەو جێگەیەوە دەست بەگێڕانەوەی رووداوەكان دەكات، كاتێك وەك ژنێكی دوو گیان، بۆ یەكەمینجار دەچێتە بەردەم سەڵاح نەسرو ئەویش بەزللەیەك لەهۆش خۆی دەبات!

لێرەوە سەردەمی دیلی‌و ئەسیری دەستپێدەكات، بەزۆرە ملێ‌ لەمێردەكەیی‌و منداڵەكانی جیادەكەنەوەو دەیكەنە ژنی سەڵاح نەسر! ئیدی وردە وردە، وەك شاهێدحاڵ، رووداوەكان لەبەرچاویدا كەڵەكە دەبن.. تێوەگلاندنی ئەو كچە بەهرەمەندو هونەرمەندانەی تازە هاتونەتە بواری هونەرو نواندنەوە، كە لەگەڵ بەرپرسانی تری ئەمنی‌و حكومی‌و بازرگانان، پێكەوە گروپ گروپ، تۆڕێكی گەورەیان لێدروستكردوون. هەر ناڕەزایەتی‌و نەخێرێكیش، وەڵامەكەی كوشتن‌و بڕین بووە، هەروەك سیناریۆی كوشتنی (ئەسمەهان) لەرووداوێكی پڕ تەمومژداو سوعاد حوسنی، سەندرێلای سینەمای میسری، لە لەندەن، بەهەمان دەستور..!

ئیعتیماد، چوار ساڵ دەبێتە شاهێدحاڵی ئەو رووداوگەلەی، كە لەدوای گرتن‌و زیندانیكردنی سەڵاح نەسرو تەنانەت لەبەردەم جەمال عەبدولناسریش، هێزو بوێری ئەوەی نییە، ئاشكرایان بكات، هەر بۆیە دەنوسێت: دەمەوێ‌ هاوار بكەم‌و بقیژێنم، هیچ گوناهێكی منی تێدای نییە، ئەوەی كردوومەو، بینیومە!

ئەو، گێڕانەوەكانی لەدوای گرتن‌و زیندانیكردنی نەسر، بەدیداری جەمال عەبدولناسر‌و بەناونیشانی (6 سەعات لەماڵی زەعیمی كۆچكردوو) دەستپێدەكات‌و چیرۆك بەدوای چیرۆك، وێنەی ئازار بە ئازارمان بۆ دەكێشێت: نەسر، زۆرینەی كاتەكان، بەرامبەر بەكارە سێكسییەكانی دایدەنیشاندم! بەبێئەوەی بوێری ئەوەم هەبێ‌ هیچ بڵێم.. سكێس لەگەڵ ژنە هونەرمەندەكان، هاوڕەگەزبازی لەگەڵ منداڵ‌و نەوجەواناندا! ئەو نەخۆشبوو، نەخۆش، گرێی هەست بەكەمكردنی هەبوو..!

بەناوی پاراستنی نیشتمان‌و دژبوونی ئیمپریالیزم، سەڵاح نەسر، دۆزەخێكی وەهای داخستبوو، كە گڕو كڵپە و پریشكی، دامێنی زۆربەی ژنە هونەرمەندەكانی میسری گرتەوە، نەبیلە عوبێد، ئیلهام شاهێن‌و زۆری تری لەناخەوە سوتاند! هەندێكیش دەربازبوون، وەك فاتن حەمامەو عومەر شەریف، كە پێكەوە هەڵاتن‌و تا زیندانیكردنی نەسر، نەگەڕانەوە قاهیرە..

(ژیانم ئاسودە بوو، ئارام بوو لەگەڵ هاوسەرو منداڵەكانم..بەڵام گۆڕا بۆ دۆزەخ و بوو بە عەزاب، بەهۆی سەڵاح نەسری شەیتان)، ئیعتیماد، ئەمەش دەڵێت..

چیرۆك‌و حەقیقەتی رووداوەكان، هەر زوو وایكرد بەچاپ‌و بڵاوكردنەوەی ئەم كتێبە لەساڵی (1988)دا، تەنها لەدوای سێ‌ مانگ شەش جار چاپبكرێتەوە. ئەگەرچی یەكێك لەجارەكانیش، لەهەوڵێكی دەزگای هەواڵگری، سەرجەم كۆپییەكانی لەبازاڕ كۆكرانەوە، بەڵام ویژدانی هەژاو و ناسۆری دەرونی ژنە هونەرمەندەكانی میسرو چیرۆكی دڵشكانی (عەبدولحەلیم حافز و سوعاد حوسنی) كە سەڵاح نەسر رێگەی نەدا عاشقانە بەیەك بگەن.. بەوەی هەموو ئەو كارە سێكسییانەی بە سوعاد حوسنی-یان كردبوو، بەتۆماركراوی بۆ عەبدولحەلیم-یان نمایشكردو، ئەوەش وایكرد ئەو شۆكە ناخی بڕزێنێ‌‌و لەكۆڵی نەبێتەوە، هەتا كوشتی..!

ئەو داڕزانە رۆحی‌و دڵشكانە گەورەو نائومێدبوونە، ئەوكاتە رونتر بەرجەستە دەبێت، كاتێك لەزمانی ژنە هونەرمەند (نەبیلە عوبەید)، ئاكتەری سەرەكی فیلمی (كشف المستور)، كە خۆی یەكێكە لەقوربانییەكانی دەستی سەڵاح نەسر، بەر یەكێك لەدیالۆگەكانی دەكەوین، كە دەڵێت (واتا، هەموو ئەو خەباتەی لەسەر جێگەی نوستنەكان لەپێناو نیشتماندا كردمان، هیچ ئەنجامێكی نەبوو)..!

ئەم دیالۆگە، چیرۆكە سەیرو سەمەرەكانی ژنە هەواڵگری ئیسرائیلی (تیسیبی لیڤنی)، یەكێك لەدیارترین سیخوڕەكانی دەزگای هەواڵگری مۆساد، لەئەندێشەدا زۆرتر تۆخ دەكەنەوە، بەڵكو جیاوازییەكیش ئەگەر هەبێ‌، هەر ئەوەندەیە، لیڤنی، بۆ خۆی كارمەندی دەزگای هەواڵگری بووەو باوەڕیوایە كە كوشتن‌و خەوتن لەپێناو ئیسرائیلدا، ئەركی نیشتمانی‌و نەتەوەییەو، بەڤیدۆكردنی كارە سێكسییەكانیشی، سەركردە سیاسییەكانی عەرەبی، بۆ ئەبەد كۆت‌و بەندكرد! بەڵام نەبیلە عوبەیدو سوعاد حوسنی‌و هەموو ئەوانی تر، بەزەبری ترس‌و تۆقاندن، هەڕەشەی مەرگ‌و ژیان، دەزگای هەواڵگری كردوونییەتە تەڵەی باڵیۆزو سیاسی‌و گوایە نەیارانی شۆڕشی یۆلیۆ‌و دەسەڵاتی ئەوكاتی میسر..!

هەروەك چۆن ئێستاش هەن لەدونیادا، لەپێناو پاراستنی پێگەو دەسەڵاتەكانیان، سەرمایەو بازرگانییەكانیان، ململانێ‌ جیاوازەكانیان، چیرۆكەكانی سەڵاح نەسر، بەسیناریۆی جیاواز، درێژە پێدەدەن..



گەلەری