مەلا بەختیار رایگەیاندووە، رووداوەكانی ئەم دواییە یەكێتی بردە قۆناغێكی نوێی كێشە و ململانێكان، دەشڵێت، "پێویستە بە ئاراستەی چارەسەر ھەنگاو بنرێت و هەردوولا رێزی یەكتری زیاتر بگرن."
مەلا بەختیار ئەندامی ئەنجومەنی باڵای سیاسی و بەرژەوەندییەكانی یەكێتی لەگەڵ جۆشوا لویس بەرپرسی سیاسەتی ناوخۆ لە هەرێمی كوردستان لە بەشی سیاسی كونسوڵخانەی ئەمریكا کۆبووەوە و دواتر راگەیەنراوێکی بڵاوکردەوە.
بەگوێرەی راگەیەنراوەکە، مەلا بەختیار ئاماژەی بۆ ئەوەكردووە، "رووداوەكانی
ئەم دواییە یەكێتی بردە قۆناغێكی نوێی كێشە و ململانێكان و ناكرێت لەوە زیاتر زیان
بە یەكێتی و جەماوەرەكەی و ژیانی حزبایەتی یەكێتیش بگەیەنرێت، چونكە یەكێتی لەناو
هاوكێشەكاندایە و حزبێكی بچوک نییە، بۆیە پێویستە بە ئاراستەی چارەسەر ھەنگاو بنرێت
و هەردوولا رێزی یەكتری زیاتر بگرن و دۆخەکەش ئارام بکرێت باشترە."
لە ٨ی تەممودا، دۆخی ناوخۆی یەکێتی بەرەو قۆناغێکی نوێ رۆشت و تیایدا بەرپرسانی
دەزگای زانیاری و دەزگای دژەتیرۆر و چەند بەرپرسێکی دیکەش گۆڕدران و دواتریش لاهور
جەنگی رایگەیاند کە "بە ویستی خۆم دەسەڵاتە داراییەکانم بۆ هاوسەرۆکی دووەم جێدەهێڵم
و لەسەرۆکی لیستی هاوپەیمانی کوردستانیش دەکشێمەوە."
بەڵام دوای چەند رۆژێک، لاهور جەنگی ئەو رووداوانەی بە پلانگێڕی ناوبرد و
بافڵ تاڵەبانیش بەردەوام دەڵێت، کە یەکێتی جاران دەگەڕێننەوە.
جۆشوا لویس وتوویەتی، گفتوگۆ ستراتیژییەكەی نێوان ئەمریكا و عیراق بە باشی
بەڕێوەچووە و توانراوە ئاڕاستەیەكی جێگیر بۆ داهاتوو دیاری بكرێت و وتیشییەتی، ئەمریكا
پشتیوانی لە هەڵبژاردنێكی شەفاف و تەندروست دەكات، هەڵبژاردن بەشێكی هاوكێشەكەیە
و بەشەكەی تریشی كە زۆر گرنگە، پێكهێنانەوەی حكومەتە، گرنگیشە ئەو سەرنجە لای خەڵک
دروستببێت، كە هەڵبژاردنێكی شەفاف و هاوسەنگ بەڕێوەدەچێت.
مەلا بەختیار راشیگەیاندووە، "ئەمریكا و هاوپەیمانان رۆڵێكی گرنگیان بینی
بۆ لەناوبردنی تاڵیبان و قاعیدە و ئێستاش لە هەلومەرجی ئابوری، سیاسی و عەسكەری
وادەكات كە بكشێنەوە، ئەگەر ئەمریكا بە وریاییەوە ئاگاداری ھاوسەنگی ناو عێراق نەبێت،
لە رووی ئەمنی و ئابوریی و سیاسییەوە پشتیوانی حكومەتی عێراق نەكات خۆی بگرێت یان
زۆرتر لە پێویست ئەگەر عێراق لاوازتر ببێت، ئەوا وەكو سوریای لێدێت."
باسی لەوەشکردووە، "هەموو رۆژهەڵاتی ناوەڕاستیش پێكەوە دەكەوێتە بەر مەترسی
و دەتوانم دەستەواژەی (ئەتۆمی سیاسی) بۆ بەكاربهێنم، چونكە ئەگەر كۆی مەترسییەكان
پێكەوە یەكبگرن، وەكو ئەوە وایە كۆی تەواوی پێكهاتە ئەتۆمییەكە یەكبگرن و ئەوكاتەش
كە تەقییەوە، دۆخەكە تەواو مەترسیدار دەبێت."