سیاسەتمەدارێکی کورد دەڵێت، "گرنگ پۆست نییە، مادەی ١٤٠ و پێشمەرگە و نەوت و گاز و بودجە و مووچە و ئەو شتانەی کە باسی پارە دەکەن گرنگن ئەوەی تر باش نییە و گەڕانەیەوەیە بۆ دواوە، کێشەی گەورەمان لە بەغدا هەیە پێویستمان بە یەکگرتوویی هەیە".
مەحمود عوسمان سیاسەتمەداری کورد بە دەنگی ئەمەریکای راگەیاند، ئیشی یەکێتی و پارتی و حزبەکانی دیکە ئەوەیە کۆبوونەوەیەکی فراوان بکەن و خەڵکی ئیسلامی و سەربەخۆ و حزبەکانی تریشی تێدا بێت، هەروەها لەسەر ئەوە رێکبکەون کە کورد چی دەوێت؟
ئاماژەی بەوەشدا، "پۆست
گرنگ نییە وەکو ئێمە کە لە ساڵی ٢٠١٠ وامانکرد، ئەمەی ئێستا شتێکی هەڵەیە و زیانی
زۆری دەبێت".
دەشڵێت، "مادەی ١٤٠ و
پێشمەرگە و نەوت و گاز و بودجە و مووچە و ئەو شتانەی کە باسی پارە دەکەن گرنگن ئەوەی
تر باش نییە و گەڕانەیەوەیە بۆ دواوە، کێشەی گەورەمان لە بەغدا هەیە پێویستمان بە یەکگرتوویی
هەیە".
لەبارەی بوونی دوو کاندیدی
کورد بۆ پۆستی سەرۆک کۆمار و کاریگەریەکەی بەسەر گۆڕەپانی سیاسی و خەڵکی هەرێمی
کوردستانەوە، مەحمود عوسمان باسی لەوەکرد، "ئێستا ئەگەر بەم شێوەیە بچن دەبنە
سێ بەرە، پارتی بەجیا و یەکێتیش بەجیا و نەوەی نوێ و خەڵکی تر و ئۆپۆزسیۆنیش بەجیا،
ئەمە زەرەرمان لێ دەدات، چونکە ئەگەر یەکگرتووشبین ئەوکات هێشتا روون نییە ئەو
داواکاریانەی ئێمە جێبەجێ دەبن یان نا و چۆن جێبەجێ دەبن؟ بەڵام ئەگەر بەم شێوەیە
بین زۆر لاوازتر دەبین و شتێکی خراپە و نابێت سەرکردایەتیەکان رێگە بدەن".
ئەمە لەکاتێکدایە، لە
ئێستادا لەبارەی وەرگرتنی پۆستی سەرۆک کۆماری عێراقەوە ناکۆکی لەنێوان یەکێتی و
پارتیدا دروستبووە و هەریەکێکیان کاندیدی خۆیان بۆ ئەو پۆستە هەیە و بەمەش
چاودێران لەو باوەڕەدان ناکوکی زیاتر دەخاتە نێو ئەو دوو پارتە دەسەڵاتدارەی هەرێمی
کوردستانەوە.