وتەبێژی پۆلیسی هاتوچۆی سلێمانی بەهۆی دروستبوونی تەمومژێکی زۆر لەسەر شەقامەکان، هۆشداری بەشۆفێران دەدات لەبارەی دروستبوونی ئاستەنگی هاتوچۆوە لەسەر شەقامەکان و دەشڵێت، "بە هیچ مه‌به‌ستێك شۆفێران و هاوڵاتییان له‌ماڵه‌كانیان ده‌رنه‌چن له پێناو سه‌لامه‌تی گیان و ماڵیان".
بەختیاری محەمەد وتەبێژی بەڕێوەبەرایەتی هاتوچۆی سلێمانی لە لێدوانێکی تایبەتدا بۆ ئێن ئاڕ تی رایگەیاند، بەهۆی نزمبوونەوەی پلەی گەرما و بارینی بەفرێکی زۆر ئاستەنگی هاتوچۆ لەسەر شەقامەکان دروستبووە و مەودای بینین بەشێوەیەکی بەرچاو کەمبووەتەوە.
ئاماژەی بەوەشکرد، پێویستە هاوڵاتییان دۆخەکە بەگرنگییەوە
تەماشا بکەن و لە ماڵەکانیان بمێننەوە و بۆ کاری زۆر پێویست نەبێت نەیەنە دەرەوە.
باسی لەوەشکرد، پێویستە خەڵکی بزانن ئەو سەهۆڵەی لەسەر
شەقامەکان دروست دەبێت مەترسیدارە و تەنانەت تایبەتمەندی دژەخلیسکانیش ناتوانێت
رێگری لە خزان بکات، وتیشی "ئەوان داواکارن خەڵکی لە ماڵەکانیان بمێننەوە."
ئەوەسی خستەڕوو، رێگەی سیتەک بەربەستکراوە لە رێگەی دەباشانەوە
بەمەبەستی پاراستنی هاوڵاتییان و تەنها رێگەی هەواری شار بەردەستە بۆ تونێلی
پێشڕەو بەڵام ئەویش مەترسیدارە و ئاستەنگی هاتوچۆی تێدا دروستبووە و ئۆتۆمبێل
ناتوانێت تێیدا دەربچێت.
ئەمەش هاوکاتە لەگەڵ، لێدوانێکی بەڕێوەبەری کەشناسی و
بومەلەرزەزانی سلێمانی کە تێیدا داوا له‌هاوڵاتیان
ده‌كات له‌كاتی كاری زۆر پێویستدا نه‌بێت هاتوچۆ نه‌كه‌ن و پیویسته شۆفێرانیش
پابه‌ندی ڕێنماییه‌كانی هاتوچۆ بن، دەشڵێت " كاریگه‌ری ئەم شه‌پۆله تا ئێواره
به‌رده‌وامی ده‌بێت و له‌شه‌ودا لاواز ده‌بێت."
لە شەوی رابردووەوە شەپۆلێکی بەفربارین و نزمبوونەوەی پلەکانی
گەرما رووی لە ھەرێمی کوردستان کردووە و لە ناوەندی پارێزگاکانی ھەولێر و دھۆک و
سلێمانی و ھەڵەبجە و ئیدارەکانی زاخۆ و سۆران و راپەڕین بەفربارین دەستی پێکردووە
و ئاستەنگی ھاتوچۆی بۆ شۆفێران و ھاوڵاتییان دروستکردووە، جگە لە پارێزگای سلێمانی
لەسەرجەم پارێزگا و یەکە ئیدارییە سەربەخۆکانی ھەرێم دەوامی فەرمی راگیراوە.
کارزان تارق، سلێمانی
ل.ل