دانیشتووانی ناحیەکە باس لەوەدەکەن، کارەبای نیشتیمانییان نییە، ئەو کارەبایەی هەشیانە کۆمپانیای داناغاز بۆیان دابیندەکات، بەهۆی ئەوە لەو ناوچەیەدا کاردەکەن، وەک باسی دەکەن، کارەبا مۆلیدەی ئەهلییان وەک جێگرەوە نییە، جار هەیە بە چەند رۆژێک لەسەر یەک کارەبایان نییە. بەڵام هەندێک ناوچەی ناحیەکەش هەیە؛ کە کارەبایان بەردەوامە و دانیشتووانی ناوچەکە دەڵێن، "ناحیەکەمان وەک دوو ناوچەی جیاوازی لێهاتووە، دەوڵەمەندەکان کارەبایان نابڕێت و فەقیرەکانیش ئێوارە بە ماندوویی لە شوانکاری دەگەڕێتەوە بەبێ کارەبا."

ئەو هاوڵاتیانە لە ڤیدیۆکەی بۆ ئێن ئاڕ تیان ناردووە ئەوەیان خستووەتەڕوو، بەدەر لە کارەبا ناوچەکەیان خزمەتگوزاری دیکەشی نییە و وەک خۆیان دەڵێن، "دیمەنی سەربازی پێوەدیارە."

دانیشتووانی ناوچەکە دەڵێن، کە گرفتی نەوتی سپی و غازیشیان هەیە و لەم کەشە ساردەدا هۆکاری گەرمکردنەوەیان نییە.

خوێندکارێکیش دەڵێت، لەم کاتی تاقیکردنەوانەیاندا بەبێ کارەبا سەختە بۆ ئەوان، دەشڵێت، "وەک ئەوە دێتە بەرچاوم کە باپیرمان باسی دەکرد، ساڵانی رابردوو لەبەردەم چرادا خوێندوویانە، ئێستا کە ٢٠٢٢ووە ئێمە هەر بە هەمان شێوەین."

دانیشتووانی ناوچەکە داوا لە حکومەتی هەرێم دەکەن، کە بەدەمیانەوە بچێت و وەڵامی داواکارییەکانیان بداتەوە، دەشڵێن، ئەوەندەی لایەنی خۆیان لە ناوچەکەن و کارەبایان پێویستە خەڵکی مەدەنی کارەبا بەکارناهێنێت.

ناحیەی قادر کەرەم سەر بە قەزای چەمچەماڵە؛ بەڵام لەرووی بەڕێوەبردنەوە لەو ناوچانەیە کە لەنێوان حکومەتی عێراق و حکومەتی هەرێمدا کێشەی لەسەرە و دانیشتووانەکەی دەڵێن، "بوونەتە قوربانی ئەو دۆخە."

هـ.ئـ