پەروەردەی دەربەندیخان بەهۆی هاتنی شەپۆلی سەرما و شەختەوە بۆ ماوەی یەک هەفتە تاقیکردنەوەکانی دواخست.
بەڕێوەبەرایەتی پەروەردەی دەربەندیخان لە راگەیەندراوێکدا بڵاویکردەوە، بەهۆی هاتنی شەپۆلی سەرما و شەختەوە، تا رۆژی ٢٥ی ئەم مانگە دەوام رادەگیرێت و ئەو تاقیکردنەوانەی کە دەمێنێتەوە پاش پشووەکە ئەنجام دەدرێت.
ئاماژەی بەوەشکردووە، ئەنجامدانی تاقیكردنەوەكان دەكەوێتە
سەرەتای دەستپێکردنەوەی وەرزی دووەم و بەخشتەیەک کارگێڕی ناوەندەکانی خوێندن خۆیان
دایدەنێن.
هەر ئەمڕۆ، لە دوو راگەیەندراوى جیادا پارێزگارى سلێمانى
و پارێزگارى هەڵەبجە باسیان لەوەکردووە، رۆژانی سێشەمە و چوارشەمە پشووی فەرمیە لە
سەرجەم دامەزراوەکانی حکومەتدا لە سنوری ئەو دوو پارێزگایە، جگە لە فەرمانگە خزمەتگوزارییەکان.
کەشناسی هەرێمیش پێشبینی دەکات، سبەینێ سێشەممە، پلەکانی
گەرما نزمتر ببنەوە و لە هەندێک ناوچە دیاردەی بەستن و شەختە لە ناوکۆڵان و شەقامەکاندا
رووبدات.