لەدرەنگانی هەمان شەودا لە نزیک کاتژمێر دووی شەو، بە بۆمبی دەستی هێرشکرایە سەر بارەگاکانی پارتی دیموکراتی کوردستان و هاوپەیمانی تەقەدووم و هاوپەیمانی عەزم لەبەغدا.

بەگوێرەی وتەی چاودێرانی سیاسی ئەم هێرشانە لەدوای رێکەوتنی سەدر دێت لەگەڵ سونەکان و پارتی دیموکرات.

غازی فەیسەڵ، سەرۆکی سەنتەری لێکۆڵینەوەی ستراتیژی عێراق، ئاماژەی بەوەدا، هێرشەکان دەبنە هۆی بەردەوامبوونی کلتوری توندوتیژی و نادەوڵەتی و تیرۆر و لەوانەیە عێراق بەرەو شەری ناوخۆیی ببات.

باسی لەوەشکردووە، ئەو جۆرە هێرشانە دەبنە هۆکار بۆ زیادبوونی هەژاری و ناخۆشیی بۆ گەلی عێراق، ئەوەش هەمووی دەگەڕێتەوە بۆ سیاسەتی مافیاییەکانەوە و ئەو سیاسەتەی کە چەکێکە رێز لە یاسا نێودەوڵەتی و ناوخۆییەکان ناگرێت و بەدوای دەستکەوتی سیاسییەوەیە لەسەر حسابی دۆخی عێراق.

وتیشی، "پێویستە رووبەڕووی هەموو ئەو پێشێلکاریانە بینەوە و هەڵوێستەی جدی هەبێت و بزانرێت کە ئەو موشەکانەی دەندرێن بە باڵوێزخانەی ئەمریکاوە هەڕەشە لە ئاسایشی کۆمەڵگەی عێراق دەکەن".

جەختیشی کردەوە، "نەخشەی نوێی سیاسی لە وڵاتدا بەرەو ئاشتی مەدەنی و دەستەبەرکردنی گەشەپێدان و روبەڕوبوونەوەی کێشەکانی هەژاری و نەخوێندەواری و بێکاری و توندوتیژی و تیرۆر دەڕوات، بەڵام ئەو هێزانە هەن کە بانگەشەی بەرگری کردن دەکەن لە ژێر ئەنجامدانی تیرۆر و کوشتندا."

ئەمەش لەکاتێکدایە، عێراق لەسەروبەندی دەستنیشانکردنی سەرۆک کۆماری نوێی وڵاتە و ئامادەکاری دەکات بۆ ورەکارییەکانی پەیوەست بە پێکهێنانی کابینەی نوێی عێراق و دەستپێکردنی کارەکانی خولی پەرلەمانیی پێنجەم.