لە بەرامبەردا، لەسەر داوای قاسم جومارت سەرۆکی کازاخستان، هەر زوو روسیا ژمارەیەک سەربازی رەوانەی کازاخستان کرد بە مەبەستی هاوکاریکردنی هێزە ئەمنییەکان لە دامرکاندنەوەی خۆپیشاندانەکان، هێزەکانی روسیا لە شارەکانی ئەلماتی پێگەی دەستپیکردنی خۆپیشاندانەکان و شاری نورسوڵتانی پایتەخت بڵاوەیانپێکرا.

لە لێدوانێکدا، ئەنتۆنی بلینکن وەزیری دەرەوەی ئەمریکا بەرپرسانی کازاخستانی ئاگاداکردەوە لە مەترسیەکانی رێگەدان بە بڵاوکردنەوەی سەربازی روسی لە خاکەکەیان و رایگەیاند، ئەگەر ئەو سەربازانە لە کازاخستان جێگیربن دواتر پاشەکشەپێکردنیان قورس دەبێت.

لای خۆیەوە، کۆشکی کریملن لێدوانەکانی بلینکنی رەتکردەوە و ئاماژەی بەوەدا، ئەو هێزانە بۆ پاراستنی ئاشتی کازاخستان نێردراون و ماوەی مانەوەیان لەو وڵاتە سنوردارە.

کۆشکی کریملین باسی لەوەشکردووە، کە سەرۆکی روسیا و سەرۆکی کازاخستان پەیوەندییەکی تەلەفۆنییان ئەنجامداوە و دوایین گۆڕانکارییەکانی کازاخستانیان تاوتوێ کردووە. 

وەک هەوڵێک لە دژی پەیوەندیکردنی ژمارەیەک سەربازی وڵاتەکەی بە خۆپیشاندەرانەوە، سەرۆکی کازاخستان فەرمانی دەستگیرکردنی ژمارەیەک بەرپرسی پۆلیسی و کەریم ماسیۆڤی بەرپرسی دەزگای دژە تیرۆری بە تۆمەتی خیانەت و دەستێکەڵکردن لەگەڵ هێزەکانی دەرەوەدا.

ماوەی هەفتەیەکە خەڵکی کازاخستان دژی بەرزبوونەوەی نرخی سوتەمەنی دەستیان بە خۆپیشاندان کرد و بەپێی راپۆرتی چاودێرانیش تا ئێستا نزیکەی ٨٠ پۆلیس و سەدان خۆپیشاندەر بەهۆی رووبەڕووبوونەوەوە کوژراون.

کازاخستان یەکێکە لەو وڵاتانەی بە کانزای سروشتی وەک یۆرانیۆم و گازی سروشتی و نەوت دەوڵەمەندە و هیچ سنورێکی بەسەر ئاوەوە نییە، لە ساڵی ١٩٩٠ لە یەکێتی سۆڤیەت جیابووەوە و سەربەخۆی خۆی وەگرت و لە ئێستاشدا بە هاوپەیمانێکی نزیکی روسیا دادەنرێت.