سەرۆک وەزیران و فەرماندەی گشتیی هێزە چەکدارەکانی عێراق، سەرۆکایەتی کۆبوونەوەیەکی نائاسایی ئەنجومەنی وەزاری بۆ ئاسایشی نیشتیمانی کرد و وتی، "رێگە نادەین هیچ لایەنێک عێراق پەلکێشی ناو شەڕ و ململانێکان بکات".
ئەمڕۆ دووشەممە ٢ـی ئەزاری ٢٠٢٦، محەمەد شیاع سودانی، سەرۆک وەزیران و فەرماندەی گشتیی هێزە چەکدارەکانی عێراق، سەرۆکایەتی کۆبوونەوەیەکی نائاسایی ئەنجومەنی وەزاری بۆ ئاسایشی نیشتیمانی کرد کە کۆبوونەوەکە تایبەت بوو بە تاوتوێکردنی پەرەسەندنە ئەمنییە مەترسیدارەکانی ناوچەکە و پاراستنی ئاسایشی ناوخۆی عێراق.
بە گوێرەی
راگەیەندراوی کۆبوونەوەکە، سودانی فەرمانی ئاراستەی سەرجەم دەزگا ئەمنییەکان کرد کە
بە توندی رووبەڕووی هەر کارێک ببنەوە کە ئاسایش و سەقامگیری وڵات دەخاتە مەترسییەوە.
جەختیشی کردەوە
کە حکومەت رێگە بە هیچ لایەن یان گروپێک نادات عێراق پەلکێشی ناو ئەو ململانێ و شەڕانە
بکات کە لە ئێستادا لە ناوچەکەدا لەئارادان.
هەروەها لە کۆبوونەوەکەدا
جەخت کرایەوە کە حکومەتی عێراق پابەندە بە پاراستنی نێردە دیپلۆماسییەکان و رێگە
نادات هێرش بکرێتە سەر باڵیۆزخانەکان یان زیان بە دامەزراوە خزمەتگوزارییەکان بگات.
هەر لە کۆبوونەوەکەدا
ئەنجومەنی ئاسایشی نیشتمانی ئاماژەی بەوە کرد، بڕیاری شەڕ و ئاشتی و جوڵەی سەربازی
تەنها لە دەسەڵاتی دەوڵەت و دامەزراوە دەستوورییەکاندایە و خاکی عێراق نابێت بۆ
ململانێی دەرەکی بەکاربهێنرێت.
بەهۆی مەترسییەکانی
پەرەسەندنی شەڕ، وەزیرانی نەوت، بازرگانی و کارەبا لە کۆبوونەوەکەدا ئامادە بوون،
سودانی و وەزیرەکان پلانی نائاساییان بۆ دابینکردنی وزە و سووتەمەنی و پاراستنی
ئاسایشی خۆراک تاوتوێ کرد، تاوەکو لە کاتی فراوانبوونی شەڕدا هاوڵاتییان تووشی قەیرانی
بژێوی و وزە نەبن.
حکومەت دووپاتی
کردەوە کە مافی گردبوونەوە و خۆپیشاندانی ئاشتییانە پارێزراوە، بەڵام پێویستە هەموو
هەنگاوەکان لە چوارچێوەی یاسا نیشتمانییەکاندا بن و نەبنە هۆی تێکدانی ئارامیی گشتی.