پێشتر، رێکخراوە مرۆییەکانی سەر بە نەتەوەیەکگتووەکان بڵاویانکردەوە، لەسەرەتای مانگی تشرینی دووەمی ئەمساڵەوە نزیکەی ٢٢.٨ ملیۆن هاوڵاتی ئەفغانی، کە زیاتر لە نیوەی دانیشتوانەکەی دەکات، روبەڕوی " کەمبوونەوەی بەرچاوی خۆراک دەبنەوە."

یاریدەدەری ئەمینداری گشتی نەتەوەیەکگرتووەکان بۆ کاروباری مرۆیی دەشڵێت، "هەموومان دەبینین کە داڕمانی ئابوری ئەفغانستان بەبەرچاومانەوە روودەدات، تەنانەت هەموو هەفتەیەک قۆناغێک لە داڕمانی دەبینین."

خراپی دۆخی ئابوری و گوزەرانی هاوڵاتی و خێزانە ئەفغانییەکان لە ئاستێکدایە، کە هەندێک لە خێزانە ئەفغانییەکان دەستیانکردووە بە فرۆشتنی پێداویستی خانوو و ئۆتۆمبێلەکانیان، تەنانەت ئەو خێزانانەشی کە ئەوەیان دەستنەکەوتووە، هەستاون بە فرۆشتنی کچە منداڵەکانیان، یان تەنانەت بە شوودانیان.

مارتن گریفیت ئاماژەی بەوەشکردووە، لە ئێستادا نزیکەی چوار ملیۆن منداڵ لە ئەفغانستان لە خوێندن دابڕاون، لە ماوەیەکی نزیکی داهاتوودا نۆ ملیۆن منداڵی دیکەش لە خوێندن دادەبڕێن، هۆکارەکەشی بۆ ئەوە دەگەڕێنێتەوە کە ٧٠٪ی مامۆستاکانی ئەو وڵاتە بەهۆی وەرنەگرتنی موچەکانیانەوە، ناچنەوە ناوەندەکانی خوێندن.

رۆژی ١٥ی مانگی ئابی ئەمساڵ، چەکدارانی تاڵیبان، پاش کۆنتڕۆڵکردنەوەی زیاتر لە ٢٠ گەورە ویلایەتی ئەفغانستان، چوونە نێو کابوڵی پایتەختەوە.

ئەفغانستان، دانیشتوانەکەی ٣٨ ملیۆن کەسە و نزیکەی ٤.٥ ملیۆن کەس لەکابوڵی پایتەختدا دەژین کە دەکاتە ١٢٪ رێژەی دانیشتوانی ئەو وڵاتە کە دەکەوێتە رۆژهەڵاتی ئەفغانستانەوە.