ئەوەش هاتووە، "بە سەرسوڕمانەوە دەروانینە ئەو لێدوانەی کە باس لە پێکهێنانی لیژنە دەکات، لەکاتێکدا خۆیان لە نزیکەوە ئاگاداری کات و ساتی کوشتنەکەن و دەزانن کە هێزێکی هاوبەشی (دوو دەزگای ئەمنی) فەرمانەکەیان جێبەجێکردووە."

ئەمەش دوای ئەوە دێت، لە کۆنفرانسێکی رۆژنامەنووسیدا بافڵ تاڵەبانی هاوسەرۆکی یەکێتیی راگەیاند، "بە جێگری سەرۆکی حکومەتم وتووە کە لیژنەیەکی تایبەت بە پرسی کوشتنی عەمید موراد کانی کوردەیی پێکبهێنرێت و دواتر ئەنجامەکان بۆ هەموولایەک ئاشکرا بکرێت."

لە رۆژی ٢٦ی ئەم مانگەشدا، خانەوادەی موراد کانی کوردەیی راگەیەنراوێکیان بڵاوکردەوە و باسیان لەوەکرد، "تا ئەوکاتەی بڕیاردەر و ئەنجامدەرانی ئەو تاوانە ئاشکرا نەکرێن و رادەستی یاسا نەکرێن، پرسە بۆ کوژراوەکانمان دانانێین."

هاوکات، لاهور جەنگی لەسەر رووداوەکە رایگەیاند، داوا لە کەسوکاری شەهیدەکان دەکات دان بە خۆیاندا بگرن و هیچ پەرچەکردارێک نەنوێنن تا ئەو کاتەی دڵنیا دەبنەوە کە لێکۆڵینەوە ناکرێت و ئەنجامدەرانی ئەم کارە دەستگیر ناکرێن.

رۆژی ٢٥ی ئەم مانگە، شەڕ و روبەڕوبوونەوە لە نێوان عەقید موراد کانی کوردەیی ئەفسەر لە بەڕێوەبەرایەتی پۆلیسی راپەڕین و چەند پاسەوانێکی لەگەڵ هێزێکی ئەمنیدا روویدا، بەهۆی شەڕەکەوە ئەفسەرە پلە باڵاکە و سێ پاسەوانی گیانیان لەدەستدا، هاوکات دواتریش راگەیەنرا شامل زرار کە ئەندامی دەزگای زانیاریی بووە بەهۆی شەڕەکەوە گیانی لەدەستداوە.