سەردێڕ:

بافڵ تاڵەبانی: دەرکراوەکان دەرکراون و هەرگیز نایەنەوە ناو یەکێتی

PM:10:35:28/11/2021

16564 جار خوێندراوەتەوە

بافڵ تاڵەبانی هاوسەرۆکی یەکێتی لەبارەی دۆخی ناوخۆی یەکێتییەوە رایگەیاند، دۆخی ناو حزبەکەی بێ کێشەیە و هەڵساوەتەوە، دەشڵێت، "دەرکراوەکان دەرکراون و هەرگیز نایەنەوە ناو یەکێتی."


بافڵ تاڵەبانی هاوسەرۆکی پاش کۆبوونەوەی لەگەڵ ژمارەیەک نوێنەر و خوێندکاری زانکۆ و پەیمانگاکانەوە و لە کۆنفرانسێکی رۆژنامەوانیدا رایگەیاند، "چاوەڕێم دەکرد حکومەت باشتر ئاگای لێیان بووایە."

باسی لەوەشکرد، "لە هەوڵی حکومەت بێ هیوا بوون و هەوڵدەدەن لەرێگای حزبەوە چارەسەری بکەن."

لەبارەی کەیسی کوژرانی موراد کانی کوردەیی و چەند پاسەوانێکییەوە لە وەڵامی پەیامنێری ئێن ئاڕ تیدا رایگیاند، "کەس حەز ناکات هیچ کەسێکی دیکە بکوژرێت و داوام لە قوباد تاڵەبانی جێگری سەرۆکی حکومەتی هەرێم کردووە، لیژنەی لێکۆڵینەوە پێکبهێنن."

لەبارەی دۆخی ناو سلێمانی باسی لەوەکرد، "لەچاو خۆیدا باشە و عەیبی نییە"، لەبارەی دۆخی یەکێتییشەوە وتی، "حزب هەڵساوەتەوە و زیاتر هەڵدەستێتەوە."

بافڵ تاڵەبانی لە درێژەی قسەکانیدا رایگەیاند، "لەناو یەکێتیدا دەرکراوەکان دەرکراون و هەرگیز.. هەرگیز.. یەک ملیۆن ساڵی دیکە نایەنەوە ناو یەکێتی."

شەوی ٢٥ی ئەم مانگە، لە رانیە مورد کانی کوردەیی فەرماندە لە ناو ریزەکانی یەکێتی درایە بەر دەسترێژی گولـلە و لە ئەنجامدا خۆی و دوو پاسەوانی کوژران و پاسەوانێکی دیکەشی برینداربوو، دواتریش بەهۆی سەختی برینەکەیەوە گیانی لەدەستدا.

موراد کانی کوردەیی فەرماندەیەکی نزیک لە لاھورجەنگی بووە و بەڕێوەبەری پۆلیسی نەھێشتنی تاوانی راپەڕین بووە و چەند رۆژێک بووە لە پۆستەکەی لادراوە و گواستراوەتەوە بەشی لێکۆڵینەوە ی پۆلیسی راپەڕین.

هاوکات، لای خۆشییەوە لاهور جەنگی لەسەر رووداوی کوژرانی موراد کانی کوردەیی رایگەیاند، داوا لە کەسوکاریان دەکات دان بە خۆیاندا بگرن و هیچ پەرچەکردارێک نەنوێنن تا ئەو کاتەی دڵنیا دەبنەوە کە لێکۆڵینەوە ناکرێت و ئەنجامدەرانی ئەم کارە دەستگیر ناکرێن.

لەو بارەیەشەوە بنەماڵەکەی راگەیاندراوێکیان بڵاوکردەوە و ئاماژەیان بەوەکرد، "موراد بە برینداری لە لایەن چەکدارەکانەوە رفێندراوە و دوای شەش کاتژمێر پەیوەندی بە کەس و کارەکەیەوە کراوە و پێیان وتوون برۆن تەرمەکەی لە پزیشکی دادی لە شاری سلێمانی وەرگرنەوە، دوای وەرگرتنەوەی تەرمەکەی و توێکاری پزیشکی، دەرکەوتووە فیشەک بەرقاچی کەتووە و نەمردووە، بەڵکو دوای قۆڵبەستکردنی بە برینداری بردوویانە و دواتر لەژێر ئەشکەنجەدانێکی زۆر گیانی سپاردووە."

دەشڵێن، "بەپێی راپۆرتی زارەکی پزیشکی دادی کە لە کۆیە دووبارە بۆی ئەنجام درایەوە، دەرکەوتووە، شوێنی لێدانی کارەبا لەسەر دڵی و شوێنی چەقۆ و برینەکانی سەر جەستەی بەتایبەت بە پشت و ملیەوە و ھەڵواسینی ھەردوو دەستی بە روونی دەرکەوتووە کە لە ژێر ئەشکەنجەدا گیانی سپاردووە".

بنەماڵەکەی موراد هەڕەشەی تۆڵەکردنەوە دەکەن و دەڵێن، پرسە بۆ کوڕەکەیان دانانێن.

کێشەی نێوان هاوسەرۆکانی یەکێتی بۆ ٨ی تەمموز دەگەڕێتەوە و هیشتا چارەسەر نەبووە بافڵ تاڵەبانیش لەسەرەتادا داوای دەکرد لاهور جەنگی بچێتە دەرەوەی وڵات.

لە دوای شەوی ٨ی تەمموزەوە، بافڵ تاڵەبانی سەرۆکی هەردوو دەزگای زانیاری و دژەتیرۆری گۆڕی و دواتر لاهور جەنگی بە چەند بابەتێک تۆمەتبار کرد. کێشەکان گەیشتنە ئەو شوێنەی میدیای فەرمی یەکێتی لاهور جەنگی بە هاوسەرۆک ناونەدەبرد و لاهور جەنگیش دەستبەرداری پۆستی سەرۆکی هاوپەیمانێتییەکەی نێوان یەکێتی و گۆڕان بوو کە بۆ هەڵبژاردنەکانی پێشوەختەی عێراق لە مانگی تشرینی یەکەمدا پێکەوە بەشدار بوون و قوباد تاڵەبانی بە سەرۆکی هاوپەیمانێتییەکە دانرا.

هـ.ئـ

 








گەلەری