PM:11:02:14/08/2025
8056 جار خوێندراوەتەوە
چاوگێکی بەرپرسی باڵا لە حکومەتى عێراق بۆ ئین ئاڕ تی رەتیکردەوە هەرێم پابەند بووبێت بە رێککەوتنەکەیان لەگەڵ بەغدا بۆ هەناردەکردنەوەی نەوت و وتی، تا ئێستا هەرێم نەوت و داهاتی نانەوتی رادەست نەکردووە و بۆیە بەم جۆرە بروات ناتوانن مووچە خەرجبکەن.
ئەمڕۆ پێنجشەممە ١٤ـی ئابی ٢٠٢٥، چاوگێکی باڵا لە حکومەتی عێراق بە ئێن ئاڕ تى راگەیاند، هێشتا وەزارەتی نەوتی عێراق لە نێوان هەرێم و کۆمپانیاکانی نەوت گیریخواردووە و هەرێم و کۆمپانیاکان رۆڵ دەگۆڕنەوە لە کات کوشتن و دواخستنی رادەستکردنی نەوت و بەو هۆیەوە تا ئیستا یەک بەرمیل نەوتیان وەرنەگرتووە، لەکاتێکدا رۆژانە بەرهەمهێنانى نەوت و بەقاچاخبردنی بەردەوامە و بردنی داهاتەکەشی بەردەوامە.
ئاماژەی بەوەشکردووە، لە هەمان کاتدا هەرێم رەتیدەکاتەوە مامەڵە لەگەڵ
دیوانی چاودێری دارایی عێراق و لیژنە هاوبەشەکان بکات بەجۆرێک نوێنەرانی هەرێم
رەتیدەکەنەوە واژۆ لەسەر کۆنووسی کۆبوونەوەکان بکەن، ئەنجامەکەش ئەوەیە کە نە
داهاتی نەوت و نە داهای نانەوتی رادەست نەکراوە ئیتر چۆن مووچەی هەرێم خەرجبکەن.
ئەوەش لەکاتێکدایە، ١٣ـی ئەم مانگە حکومەتى ماوەبەسەرچوو وتی، رێککەوتنێکی
نوێیان لەگەڵ حکومەتى عێراق لەسەر نەوت کردووە و ئامادەن نەوت رادەستی کۆمپانیای
سۆمۆ بکەن.
