سەردێڕ:

حکومەتى هەرێم لەبارەى بەنزینەوە بڕیاریدا

PM:07:17:27/10/2021

30436 جار خوێندراوەتەوە

وتەبێژى حکومەتى هەرێمى کوردستان رایگەیاند "لە کۆبوونەوەى ئەمرۆى ئەنجومەنى وەزیراندا لەبارەى بەنزین و نرخى بەنزینەوە بڕیاردرا بە مۆڵەتدانى هەر کۆمپانیا و لایەنێک کە بیەوێت هاوردەى بەنزین بکات".


ئەمڕۆ چوارشەممە، جوتیار عادل وتەبێژى حکومەتى هەرێمى کوردستان لە کۆنگرەیەکى رۆژنامەوانیدا لە دواى ئەنجامدانى کۆبوونەوەى ئەمڕۆى ئەنجومەنى وەزیران ئاماژەى بەو بابەت و بڕیارانە کرد کە لە کۆبوونەوەى ئەمڕۆدا تاوتوێ کراوون.

 

وتەبێژى حکومەتى هەرێمى کوردستان لەبارەى نرخى بەنزینەوە ئاماژەى بەوە کرد " لە کۆبوونەوەکەدا ئەنجومەنی وەزیران، وەزارەتە پەیوەندیدارەکانی ڕاسپارد، ئاسانکاریی تەواو بکەن و مۆڵەت بدەن بە هەموو ئەو کەس و کۆمپانیایانەی، کە ئامادەن سووتەمەنی بە نرخی گونجاو، هاوردەی هەرێم بکەن، بە مەرجی پابەندبوون بە پێوەرەکانی کوالیتی سووتەمەنی هاوردەکراو و سەلامەتی و تەندروستیی گشتيی هاووڵاتیان".

 

لەدوای تەحەدداکەی شاسوار عەبدولواحید سەرۆکی جوڵانەوەی نەوەی نوێ، حکومەتی هەرێم رایگەیاند، جارێکی تر بەنزینی عێراق دەگاتە سلێمانی و دوێنیش، بڕی ٥٤٠ هەزار لیتر گەیشتوەتە سلێمانی و بڕیاریشە، بڕەکە بۆ سەروو یەک ملیۆن لیتری رۆژانە زیاد بکرێت.

ئەمەش لەکاتێکدایە، لە ئێستادا نرخی بەنزین بۆ سەروو هەزار دینار بۆ هەر لیترێک بەرزبووەتەوە و لای خۆشییەوە، شاسوار عەبدولواحید سەرۆکی جوڵانەوەی نەوەی نوێ داوایکرد رێگەیان پێبدرێت بەنزینی ٥٠٠ دیناری بهێنن و رۆژی ٢٤ی ئەم مانگەش؛ جوڵانەوەکە بە نوسراوی فەرمی داوای لە وەزارەتی سامانە سروشتیەکان کرد بێ ھیچ باج و سەرانەیەک رێگای بدەن بەنزین بھێنێتە ھەرێم.

لەماوەی رابردوودا و بەشێوەی پلەبەندی نرخی بەنزین بەرزبووەوە و بەمەش بارگرانی بۆسەر ھاوڵاتیان و شۆفێران دروستکردووە.

بەرپرسانی ھەرێم لەچەندین لێدوانی جیاوازیاندا بەڵێنیان بە ھاوڵاتیاندا قەیرانی بەنزین و بەرزبوونەوەی نرخەکەی بەزوترین کات چارەسەر بکەن، بەڵام تائێستا ئەو کێشەیە بە چارەسەر نەکروای ماوەتەوە و بەردەوام نرخی بەنزینش لەبەرزبوونەوەدایە.


 


 








گەلەری

‌بەپەلە