ئەو مامۆستایانە باس لەوەدەکەن، کە ماوەی ١٧ رۆژە بایکۆتی هۆڵەکانی خوێندنیان کردووە و حکومەت وەڵامی داواکارییەکانیان ناداتەوە، بۆیە بڕیاریان داوە لە بەردەم ئەنجومەنی وەزیرانی هەرێمدا دەست دەکەن بە هەڵدانی خێمە.

دوێنێ پەرلەمانی کوردستان کۆبووەوە و بڕگەیەکی دانیشتنەکە بەپێی کارنامەکەیان تایبەت بوو بە گرفتەکانی مامۆستایانی وانەبێژ، بەڵام هیچ کام لە وەزیری پەروەردە و دارایی ئامادەنەبوون و بەهۆیەوە پەرلەمانتارانی نەوەی نوێ رێگەیان نەدا دانیشتنەکە بەردەوام بێت و رایانگەیاند، کە دەبێت بڕیار بدرێت نەوەک گفتوگۆ بکرێت و راپۆرت بخرێتەڕوو، ئەوانە چەند جاری دیکە لە رابردوودا کراون و دەبێت بڕیار بدرێت لەبارەیانەوە و دابمەزرێندرێن.

مژدە مەحمود پەرلەمانتاری نەوەی نوێ باسی لەوەکرد، کە حکومەت داهاتی لەبەردەستدایە و توانای هەیە و دەتوانێت دایانبمەزرێنێت.

ئەمڕۆش بڕیارە ئەنجومەنی وەزیرانی هەرێم کۆببێتەوە، بەڵام هیچ بڕیگەیەکی تایبەت بە گرفتەکانی مامۆستایانی وانەبێژ تێدا نییە.

مامۆستایانی وانەبێژ بەشێکی گرنگی تەواوکاری پرۆسەی پەروەردە و فێرکردنن لە هەرێمی کوردستاندا، بەڵام وەک خۆیان باسی دەکەن، ئەو بڕە پارەیە "مەقتوعە"یەی لەبری وانەکان بۆیان دابینکراوە، جگە لەوەی کەمە و بەشی هاتوچۆکەیان ناکات نەوەک ئەو ئەرکەی لەسەریانە؛ دواش دەخرێت و لەکاتی خۆیدا وەریناگرن، ئەوە جگە لەوەی مۆڵەتی دایکانە و نەخۆشیان نییە و دەبێت دەوام هەربکەن.

بە جۆرێک، دوێنێ لەکاتی گردبوونەوەی مامۆستایانی وانەبێژ لەبەردەم پەرلەمانی کوردستاندا، مامۆستایەک باسی لەوەکرد، کە مامۆستایەکی هاوڕێیان بەهۆی ئەوەی توشی شێرپەنجە بووە و دەرزی کیمیایی بۆ کراوە سێ رۆژ نەچووەتەوە دەوام فەسڵ کراوە.

بەشێک لەو مامۆستایانە ماوەی زیاتر لە ١٥ ساڵە وانەبێژن و تاوەکو ئێستا نەکراون بە گرێبەست یان دابمەزرێندرێن، وەک خۆشیان دەڵێن، گوزەرانیان سەختە و ئەرکیان زۆرە، بەڵام ئەوەی بەرامبەر ئەرکەکەیان پێیان دەدرێت کەمە و بەشی هاتوچۆکەیان ناکات.

هـ.ئـ