لەو بارەیەوە رێكان جه‌مال سه‌رۆكی لیژنه‌ هاوبه‌شه‌كانی قائیمقامیه‌تی سلێمانی رایگه‌یاند، له‌كاتی سه‌ردان و پشكنینی لیژنه‌كان ئه‌و شوێنانه‌ی پابه‌ند نه‌بووبن‌ ده‌ستبه‌جێ‌ داده‌خرێن و خاوه‌نه‌كه‌شیان رووبه‌ڕووی رێكاری یاسایی ده‌كرێنه‌وه‌.
ئاماژەی بەوەشكردووە، بڕیارەکە سەرجەم دوكانه‌كانی ساردەمەنی، شیرینی، چێشتخانە و چایخانە و هەموو ئەوشوێنانەی خواردن و خواردەمەنی بەرهەمدەهێنن دەگرێتەوە.

ئەوەشی خستووەتەڕوو، به‌هۆی هاتنی وه‌رزی گه‌رما و بۆ رێگریكردن له‌ مه‌ترسی بڵاوبوونه‌وه‌ی نه‌خۆشییه‌كان؛ لیژنه‌ هاوبه‌شه‌كان له‌كاتی ئه‌نجامدانی سه‌ردانه‌كانیان به‌وردی له‌ شۆردن و خاوێنكردنه‌وه‌ی تانکی سەربانی شوێنه‌كان ده‌پرسنەوە.

دەشڵێت، تانكی سه‌ربانی بەشێک لە شوێنەکان ژەنگی کردووە، به ‌شۆردن و به‌پاككردنه‌وه‌ خاوێن نابێته‌وه له‌به‌ر ئه‌وه‌ پێویستیان بەگۆڕین هەیە، چونکە‌ به‌پێی رێنماییه‌ ته‌ندروستییه‌كان ژه‌نگ یه‌كێكه‌ له‌و مادانه‌ی‌ لەش توانای شیكردنه‌وه‌ی نییه‌، بۆیه‌ له‌ناو گه‌ده‌ و له‌شدا ده‌نیشێت و مرۆڤ توشی نه‌خۆشییه‌ مه‌ترسیداره‌كان و شێرپه‌نجه‌ ده‌كات.

ئەوەش دوای ئەوە دێت، هه‌فته‌ی رابردوو و لە ١٧ی مانگدا، بۆ شۆردن وخاوێنكردنه‌وه‌ی تانكییەکانیان، قائیمقامیەتی سلێمانی ماوه‌ی حه‌وت رۆژی بۆ هه‌موو ئه‌و شوێنانه‌ی‌ خواردن و خواردنه‌وه‌ به‌رهه‌مده‌هێنن دیاریكردبوو.