ئەمەش لە کاتێک دایە، ئەمڕۆ چوارشەممە، کۆتا بڕگەکانی بودجەی ئەمساڵی عێراق لە کۆبوونەوەی لیژنەی دارایی و سەرۆکی پەرلەمانی عێراق گفتوگۆی لەسەر درا و محەمەد نوری ئەندامی لیژنەی دارایی لە پەرلەمانی عێراق رایگەیاند، تەنها پێنج بڕگەی بودجەی ئەمساڵ ماوە پەسەند بکرێت و ئەو بڕگانەی ماون بریتییە لە بودجەی گواستنەوەى پشکی هەرێم، هەروەها تەنها لە ماوەی پێنج رۆژی دیکە ئەوانەش دەنگیان لەسەر دەدرێت.

ئاماژەی بەوەشدا، هیچ ناکۆکیەک لەسەر دۆسیەی بودجەی هەرێمی کوردستان نییە بەڵکو دواکەوتنی ئەو بڕگەیەی بودجە پەیوەستە بە رێککەوتنی نێوان حکومەتی بەغدا و هەرێمەوە.

ئەمە لە کاتێک دایە، رۆژی ١٣ی ئازار سەرۆک وەزیرانی عێراق پڕۆژەیاسای بودجەی ساڵەکانی ٢٠٢٣ و ٢٠٢٤ و ٢٠٢٥ی پەسەند کرد و رەوانەی پەرلەمانی عێراقی کرد.

بودجەی ساڵی ٢٠٢٣ی عێراق گەورەترین بودجەی عێراقە و بڕەکەی ١٩٨ ترلیۆن و ٦٨٣ ملیار و ٧١٩ ملیۆن و ٤٧٢ هەزار دینارە و تیایدا نرخی بەرمیلێک نەوت بە ٧٠ دۆلار خەمڵێندراوە و نرخی ١٠٠ دۆلاریش بە نرخی فەرمی بانکی ناوەندی کە ١٣٠٠ دینارە جێگیر کراوە، لەو بڕەش ٦٤ ترلیۆن دیناری بە کورتهێنان دانراوە.

هاوکات پشکی هەرێمی کوردستان لە بودجەی عێراق دا بە رێژەی لە ١٢.٦٧٪ جێگیر کراوە و لە کاتی تێپەڕاندنی بودجە دا هەرێمی کوردستان مانگانە زیاتر لە ترلیۆنێک دیناری بۆ دەنێردرێت و رێککەوتن لەگەڵ حکومەتی فیدڕاڵدا بە شێوازێکە، هەرێمی کوردستان داهاتی نەوت لە بانکێکدا دابنێت کە لەژێر چاودێری حکومەتی فیدڕاڵیدا بێت و دەسەڵاتی بەکارهێنانیش لەژێر دەستی سەرۆک وەزیرانی هەرێم دا دەبێت.