سەرۆک وەزیرانى عێراق رایگەیاند، حکومەت سەرجەم پێداویستی و داواکارییەکانى کۆمیسیۆنى هەڵبژاردن دابین دەکات، داواشى کرد کار بکرێت بۆ درووست کردنەوەى متمانەى هاوڵاتیان بە پڕۆسەى هەڵبژاردن.
ئەمڕۆ دووشەممە، نووسینگەى راگەیاندنى محەمەد شیاع سودانى سەرۆک وەزیرانى عێراق، بڵاویکردەوە و تیای دا هاتووە، لە میانى سەردان کردنى سەرۆک وەزیرانى عێراق بۆ کۆمیسیۆنى باڵاى سەربەخۆى هەڵبژاردنەکانى عێراق لەگەڵ بەرپرسان و کۆمیسیارانى کۆمیسیۆنى هەڵبژاردنەکانى عێراق کۆبووەوە و لە چوارچێوەى بەسەر کردنەوەکەدا بە دوادا چوونى کرد بۆ کارتى دەنگدانى هاوڵاتیان و کارەکانى کۆمیسیۆن.
هاوکات سەرۆک وەزیرانى عێراق لە وتەیەک دا رایگەیاند، حکومەت بە هەموو
تواناى خۆى هاوکار دەبێت لە دابین کردنى سەرجەم پێداویستییەکانى کۆمیسیۆن و پڕۆسەى
هەڵبژاردن، هەروەها پاڵپشتى خۆیشى بۆ دەزگاى هەڵبژاردنەکانى عێراق دووپات کردەوە.
سەرۆک وەزیرانى عێراق وتیشى، بوونى متمانە و شەفاف بوون لە کارەکان،
هۆکارێکى سەرەکى و گرنگى پاراستنى بێ لایەنى و پیشەیی بوونى کۆمیسیۆن دەرەخات،
هاوکات بە پێویستیشى زانى کە دەبێت کۆمیسیۆن کراوە بێت بە رووى سەرجەم حیزب و
پێکهاتە و لایەنە سیاسى و مەدەنییەکانى عێراق، هەروەها دوور خستنەوەى نیگەرانى و
مەترسییەکان لەسەر کۆمیسیۆن و وەرگرتنى رێنمایى و رەخنەى ئیجابى لەسەر ئەم دەزگا
دەستووریە، ئایندەى کۆمیسیۆنەکە رۆشن دەکات و پێشترى دەخات.
کۆمیسیۆنى باڵاى سەربەخۆى هەڵبژاردنەکانى عێراق،
دەستەیەکى حکوومى سەربەخۆیە و لە ژێر چاودێرى ئەنجوومەنى نوێنەرانى عێراقە.
کۆمیسیۆنی باڵای
هەڵبژاردنەکان لە عێراق لە ٣١ى ئایارى ساڵی ٢٠٠٤ دامەزراوە و هاوکات ئەنجوومەنی
کۆمیسیاران بەڕێوەی دەبات کە لە نۆ ئەندام پێکدێت و ئەو ئەندامانەى کۆمیسیاران
سەرجەمیان کەسانى یاسایین و پلەى دادوەریان هەیە.
هەموو چوار
ساڵ جارێک، هەڵبژاردن لە نێوان ئەندامەکان دەکرێت بۆ هەڵبژاردنی سەرۆکی ئەنجوومەن و
ئەو ماوەیە درێژ ناکرێتەوە، ئەنجوومەنەکە لە ١٦ وڵاتی دەرەوەی عێراق نوێنەرایەتیان
هەیە، ئەوەش بۆ ئەوەی هاوڵاتیانی عێراقی لە
دەرەوە
بێبەش نەبن لە پڕۆسەی هەڵبژاردن.