بەڕێوەبەرایەتی کەشناسی سلێمانی بە ئێن ئاڕ تی راگەیاند، لە ٢٤ کاتژمێری رابردوودا ٤٧ ملیم باران لە سەنتەری سلێمانی باریوە و ئەمڕۆش، ناجێگیری کەش و هەوا بەردەوام دەبێت.
پاش ئەوەی رۆژی هەینی شەپۆلێکی باران بارین رووی لە هەرێم و ناوچەکە کرد، بەڕێوەبەرایەتی کەشناسی سلێمانی بە ئێن ئاڕ تی راگەیاند، لە ٢٤ کارژمێری رابردوودا ٤٧ ملیم باران لە سەنتەری سلێمانی باریوە و لەم ساڵدا لە سلێمانی ٧٨٥ ملیم باران باریوە، بەراورد بە ساڵی رابردوو ئاستی باران زیادی کردووە.
هاوکات بەڕێوەبەرایەتی
کەشناسی هەرێم لە راگەیاندراوێكدا بڵاویکردووەتەوە، ئەمڕۆ ئاسمان نیمچە هەور و هەورى
تەواو دەبێت و ناجێگیری کەش و هەواش ئەمڕۆ بەردەوام دەبێت.
باسی لەوەشکردووە، ئەمڕۆ
ناوچە شاخاوییەکان و سنووریەکان هەندێ کات
ئاسمان دەگۆڕێت بۆ هەورى تەواو لەگەڵ باران بارین بەشێوە تاوە باران و نمە باران و
پلەکانی گەرماش یەک بۆ دوو پلە دادەبەزن.
ئەوەشی خستووەتەڕوو، لە سەنتەرى
پارێزگاى هەولێر ئەگەرى بارینی نمە بارانى پچرپچر و لە ناوچەى جیا جیا هەیە و لە سەنتەرى
پارێزگاى سلێمانى و دهۆک لە پاش نیوەڕۆ لە هەندێ ناوچەى باران دەبارێت و لە پارێزگاى
هەڵەبجە لە هەندێک ناوچە شاخاوییەکانى نمە باران دەبێت و پارێزگاى کەرکووکیش
ئاسمانى نیمچە هەور دەبێت .
بەڕێوەبەرایەتی کەشناسی
هەرێم لە راگەیاندراوەکەیدا باسی لەوەش کردووە،سبەی دووشەممە ئاسمان ساماڵ و پەڵە
هەور دەبێت و لە ناوچە شاخاوویەکان بەگشتی ئاسمان نیمچە هەور
دەبێت و پلەکانی گەرما یەک بۆ سێ پلە بەرزدەبێتەوە.
بەپێی راگەیاندراوەکەی
کەشناسی بەرزترین پلەکانی گەرمای پێشبینیکراو بە پلەی سیلیزی بۆ ئەمڕۆ بەم جۆرە
دەبێت :
هەولێر: ٣٣ پلەى سیلیزى
سلێمانی: ٢٦ پلەى سیلیزى
دهۆک: ٢٥پلەى سیلیزى
کەرکوک: ٣٥ پلەى سیلیزى
هەڵەبجە: ٣٠پلەى سیلیزى
حاجی ئۆمەران: ١٦ پلەى سیلیزى
زاخۆ : ٣١ پلەى سیلیزى
سۆران: ٢٨ پلەى سیلیزى
گەرمیان: ٣٦ پلەى سیلیزى