بەپێی ئەنجامە بەراییەکان هاوپەیمانێتی رەنج و ئازادی کە پێهاتووە لەهەریەکە لە پارتی چەپی سەوزو پارتی کرێکاریی تورکیا و پارتی رەنج، پارتی ئازادیی کۆمەڵگەیی، پارتی بزووتنەوەی رەنجدەران بەربەستی ٧% تێپەڕاندووەو وەکو فراکسیۆنێک بەشداردەبن لە پەرلەمانی داهاتوی تورکیا.
شەوى رابردوو، پاش بڵاوکردنەوەی ئەنجامە بەراییەکانی هەڵبژاردنەکانی پەرلەمان و سەرۆکایەتی کۆمار لە تورکیا هاوپەیمانێتی رەنج و ئازادی، توانیویەتی بەربەستی لە ٧% تێبەڕێنێت، رێژەی دەنگەکانی بەنزیکەی ٩.١٧% یە لەکۆی ئەو دەنگانەی تاوەکو ئێستا ئاشکراکراون.
بەپێی سیستەمی 'هوندنت' کە هەڵبژاردنەکانی تورکیای لەسەر بەرێوەدەبرێت،
پێویستە هەر پارتێک ١٠%ی دەنگەکان بهێنێت بۆئەوەی بەشداری بکات لە پەرلەمان، بەڵام
لەساڵی ٢٠١٨ ئەم رێژەیە هەموار کرا بۆ ٧%، ئێستاش هەر پارتێک بتوانێت ئەو بەربەستە
تێبپەڕێنێت دەتوانێت لەخولی داهاتووی پەرلەمان بەشداری بکات.
پەرلەمانی تورکیا لە ٦٠٠ کورسی پێکهاتووە و لە ئەستەنبوڵەوە ٨٩
پەرلەمانتار دەچنە پەرلەمان و لە ئەنقەرە ٣٦ کاندید سەرکەوتوو دەبن و لە ئیزمیریش
٢٨ پەرلەمانتار دەچنە پەرلەمان و لە بۆرسا ٢٠ پەرلەمانتار و لە ئەنتاڵیا ١٧
پەرلەمانتار و لە ئەدەنا ١٥ کاندیدی سەرکەوتوو و و کۆنیا ١٥ پەرلەمانتار و
پارێزگاکانی دیکەش پشکیان لەنێوان یەک بۆ ١٤ پەرلەمانتارە.
ئەم خولەی پەرلەمانی تورکیا ٢٨ ەمین خولی پەرلەمانە، تێیدا لە ٨٧
بازنە لە تورکیا و دەرەوەی تورکیادا دەنگدرا و ژمارەی سندوقەکانی دەنگدانیش ١٩١
هەزار ٨٨٤ سندوق بوو ٢٤ پارت بەشدارییان لە هەڵبژاردنەکان کرد لەگەڵ ١٥١ کاندیدی
سەربەخۆ.
لە هەڵبژاردنەکەی دوێنێدا، ململانێیەکی بەهێز لەنێوان رەجەب تەیب
ئەردۆغان و کەمال کلیچدار ئۆغلۆ هەبوو لەسەر بەدەستهێنانی کورسی سەرۆکایەتی کۆماری
تورکیا، لەسەر پشکی هەریەکە لە پارتەکانی 'گەلی کۆماری تورکیا' و 'پارتی داد و
گەشەپێدان' خۆیان کاندید کردبوو.