بومەلەرزەیەک بە گوڕى ٤.٢ پلە بە پێوەرى رێختەر لە مەڕەشى باکوورى کوردستان روویدا.
دەزگاى کارەسات و رووداوە سروشتییەکانى تورکیا ناسراو بە (ئافاد) رایگەیاند، کەمێک لەمەوبەر بومەلەرزەیەک بە گوڕى ٤.٢ پلە بەپێوەرى رێختەر لە پارێزگاى مەڕەشى باکوورى کوردستان روویداوە و هاوڵاتیان لەکاتێکدا بەرەو سندووقەکانى دەنگدان دەڕۆن بۆ دەنگدان لە هەڵبژاردنەکانى تورکیا، بومەلەرزەکە روویداوە.
ئەمە لەکاتێکدایە، بابەتى بومەلەرزەکەى تورکیا و باکوورى کوردستان، فاکتەرێکى
گرنگى بانگەشەکانى هەڵبژاردنی پەرلەمانى و سەرۆکایەتیى تورکیا بوو، کە لەنێوان
پارتەکانى دەسەڵات و ئۆپۆزسیۆنەکانەوە، لەدژى یەکدى بەکاردەهێندرا.
بەتایبەت پارتە ئۆپۆزسیۆنەکان، پرسی بومەلەرزەکەی تورکیایان وەک کارتێکى
فشار لە بەرامبەر پارتەکەى ئەردۆغان بەکاردەهێنا و باسیان لەوەدەکرد دەرەنجامەکانى
ئەو کارەساتە سروشتییە، قوربانى گەورەى بەدواى خۆیدا هێنا و زیانى ماددى گەورەى بە
ئابوورى تورکیا گەیاند.
لە ٦ی شوباتی رابردوودا دوو بومەلەرزەی بەهێز بەگوڕەكانی ٧.٨ و ٧.٦ پلە
بە پێوەری رێختەر پارێزگای مەرەشی گرتەوە و بە هەزاران کەس بوونە قوربانى، هەر
دواى ئەو بومەلەرزە کارەساتبارەى باکورى کوردستانى گرتەوە، تاکو ئێستا هەزاران پاشەلەرزەی
دیکە روویانداوە.