نێردەی تایبەتی سکرتێری گشتی نەتەوەیەکگرتووەکان لە عێراق رایگەیاند، لەبارەی تایبەتمەندێتی عێراق و کاریگەربوونی بە گۆڕانکاری کەشوهەوا و مەترسییەکانی بۆسەر ئاسایشی نەتەوەیی و خۆراک راپۆرتێک بۆ ئەنجومەنی ئاسایشی نێودەوڵەتی سەربە نەتەوەیەکگرتووەکان بەرزدەکاتەوە.
وەزارەتی ژینگەی عێراق راگەیەنراوێکی بڵاوکردەوە و تیایدا هاتووە، نزار ئامێدی وەزیری ژینگە پێشوازی کرد لە جنین پلاسخارت نێردەی تایبەتی سکرتێری گشتی نەتەوەیەکگرتووەکان و غولام ئیسحاق نێردەی تایبەت و رێکخەری نیشتەجێ لە عێراق و کلاودیو کۆردۆن نێردەی تابیەت بە کاروباری مرۆیی و یاریدەدەری هەڵبژاردنەکان.
ئاماژەی بەوەشداوە، نزار ئامێدی پێداگریکردووە لەسەر بەهێزکردنی هاریکاری و
هەماهەنگیکردنی وەزارەتی ژینگە لەگەڵ نێردە و رێکخراوە نێودەوڵەتییەکان و لە کۆنگرەی cop 28 لە دوبەی بۆ گۆڕانی کەشوهەوا و کاریگەرییەکانی بە شاندێکی باڵا و
هونەری و لەسەر ئاستی وەزارەتەکان و کەرتی تایبەت و گشتی و رێکخراوە
نێودەوڵەتییەکان و ناوخۆییەکان بەشداری دەکات.
لەلایەن خۆیەوە، جنین پلاسخارت نێردەی تایبەتی ئەنتۆنیۆ گۆتێرێز سکرتێری گشتی رێکخراوی
نەتەوەیکگرتووەکان ئاماژەی بەوەدا، لە راپۆرتێکیدا
ئەنجومەنی ئاسایشی نێودەڵەتی و رێکخراوە نێودەوڵەتییەکان لە بارەی تایبەتمەندێتی عێراق و
کاریگەربوونی بە گۆڕانکارییەکانی کەشوهەوا و وشکەساڵی و مەترسییەکانی لەسەر
ئاسایشی نەتەوەیی و خۆراک ئاگادار دەکاتەوە.
ئاماژەی بەوەشداوە،
مەترسییەکانی بە بیابان بوون و کۆچکردنی هاوڵاتییان لە ناوچەکانیانەوە بەهۆی
وشکەساڵی و کەمبوونەوەی چالاکی کشتوکاڵی و بەرزبوونەوەی ئاستی بێکاری بەشێکی دیکە
دەبێت لە راپۆرتەکەی پلاسخارت.
دەشڵێت، لە راپۆرتەکەیدا
داوا لە کۆمەڵگەی نێودەوڵەتی و رێکخراوەکان دەکات پشتیوانی عێراق بکەن بۆ تێپەڕاندنی
ئەو قۆناغە و هەوڵدان بۆ دامەزراندنی پڕۆژە و دروستکردنی ژێرخانی ئابوری.