هیومان رایتس وۆچ رایگەیاند، هێزەکانی پاسەوانی سنوری تورکیا دەستڕێژی گوللـەیان لە هاوڵاتییانی مەدەنی سوری کردووە و کوشتویانن.
ئەمڕۆ پێنجشەممە، رێکخراوی چاودێری مافەکانی مرۆڤ(هیومان رایتس وۆچ) نوێترین راپۆرتی بڵاوکردەوە و تیایدا هاتووە، لە دژی پەنابەران هێزەکانی پاسەوانی سنوری تورکیا هێزێکی زۆر بەکاردەهێنن و دەسترێژی گوللـەیان لێدەکەن و پەنابەران ئەشکەنجە دەدەن و داوایان لە حکومەتی تورکیا کرد لێکۆڵینەوە بکات.
لە راپۆرتەکەدا باس لەوەشکراوە، لە رۆژی ١١ی
ئازاری ٢٠٢٣ هێزێکی پاسەوانی سنوری تورکیا ئەشکەنجەی هەشت هاولاتی سورییان داوە بەهۆیەوە
کەسێکیان گیانی لەدەستداوە و کەسێکی دیکەشیان بە سەختی بریندارکردووە.
دەشڵێت، لە رۆژی ١٣ی ئاداری ٢٠٢٣ پاسەوانێکی سەر
سنور پیاوێکی سوری تەمەن ٥٩ ساڵیان گوللـەباران کردووە کە زەویەکەی کێڵاوە و لە ئەنجامدا
پیاوەکە گیانی لەدەستداوە.
هیومان رایتس وۆچ ئەوەشی خستووەتەڕوو، لەو بارەیەوە
لەگەڵ وەزیری داد و وەزیری ناوخۆی تورکیا کۆبونەتەوە و داوای لێکۆڵینەوە و بەدواداچونیان
بۆ رووداوەکە کردووە.
بەڕێوەبەری رێکخراوەکە لە ئەوروپا و ئاسیای ناوەڕست
ئاماژەی بەوەکردووە، هێزەکانی پاسەوانی سنوری تورکیا بەشێوەیەکی هەڕەمەکی لەسەر
سنوری تورکیا - سوریا تەقەدەکەن و خەڵکی دەکوژن.
لە دەستپێکی ٢٠٢٣تا ئێستا روانگەی سوری بۆ مافەکانی
مرۆڤ کوژرانی ١١هاوڵاتی و برینداربوونی ٢٠ کەسی دیکەی بە دەستی هێزەکانی پاسەوانی
سنوری تورکیا راگەیاندووە.