لیژنەی دارایی پەرلەمانی عێراق رایگەیاند، کار دەکەن بۆ کەمکردنەوەی رێژەی کورتهێنان لە بودجە و داوا لە حکومەت دەکەن تەنها پڕۆژەی گرنگ و پاڵپشتیکەر بنیاد بنێت.
عەتوان عەتوانی سەرۆکی لیژنەی دارایی لە پەرلەمانی عێراق لە کۆبوونەوەی لیژنەکە رایگەیاند، دەستیان کردووە بە هەموارکردنەوەی بڕگە و ماددەکانی بودجە بەپێی گونجاویان لەگەڵ دەستوور و چەند لیژنەیەکی لاوەکی پێکهێنراوە بۆ بانگهێشتکردنی بەرپسانی جێبەجێکار.
وتیشی، "لەگەڵ ئەو بەرپرسانە گفتوگۆ و توێژینەوە دەکەین لەسەر تەرخانکردنە داراییەکانیان بۆ خێرا بەڕێکردنی هەموارەکانی پڕۆژە یاسای بودجە."
ئاماژەی بەوەشدا، توێژینەوە دەکەن لەسەر ئەگەری کەمکردنەوەی کورتهێنانی
دارایی لە بودجەی عێراق و داوا لە حکومەت دەکەن پڕۆژەی بەسوود و گرنگ بنیاد بنێت
کە ئامانجی پشتیوانیکردن بێ لە ئابوری نیشتیمانی پتەوکردنی داهاتە نانەوتییەکان.
سەرۆکی لیژنەی دارایی پەرلەمانی عێراق باسی لەوەشکرد، پێویستە پشتیوانی لە حکومەت
بکرێت و کەرتی تایبەت بەهێزبکرێت و کار بۆ سەرکەوتنی حکومەتی ئێستای عێراق بکرێت.