نوسینگەی سەرۆکوەزیرانی عێراق رایگەیاند، سەرۆکوەزیران لە پەیوەندییەکی تەلەفۆنیدا لەگەڵ وەزیری دەرەوەی ئەمریکا جەختیکردووەتەوە لەسەر هەڵوێستی نەگۆڕی عێراق بەرامبەر ئاڵنگارییە ئەمنی و ئابوری و هەرێمی و نێودەوڵەتییەکان.
نوسینگەی محەمەد شیاع سودانی سەرۆکوەزیرانی عێراق راگەیەنراوێکی بڵاوکردەوە و تیایدا هاتووە، سەرۆکوەزیران پەیوەندییەکی تەلەفۆنی لە ئەنتۆنی بلنیکن وەزیری دەرەوەی ئەمریکاوە پێگەیشت.
ئاماژەی بەوەشداوە، لە پەیوەندییە تەلەفۆنییەکەدا لەبارەی پەیوەندییەکانی
نێوان عێراق و ئەمریکا و رێگاکانی پتەوکردنی پەیوەندییەکانیان تاوتوێ کرد.
ئەوەشی خستووەتەڕوو، هەر لە پەیوەندییە تەلەفۆنییەکەدا لەبارەی هەوڵەکانی
حکومەتی عێراق بۆ چاکسازی ئابوری و جۆراوجۆرکردنی سەرچاوەکانی گەشەسەندنیان تاوتوێ
کردووە.
هەربەگوێرەی راگەیەنراوەکە، دۆسیەی ئەرکەکانی هێزە ئەمنییەکانی عێراق لە گەڕان
و هەڵکوتانە سەر پاشماوەکانی گروپی
چەکداری داعش و رۆڵی ئەمریکا لە هاوکاریکردنی هێزە ئەمنییەکان و سوپای عێراق لە
مەشق پێکردن و راوێژپێکردن گفتوگۆی لەبارەوە کراوە.
راگەیەنراوەکە ئەوەشی خستووەتەڕوو، محەمەد شیاع سودانی سەرۆکوەزیرانی عێراق
جەختیکردووەتەوە لەسەر بەردەوامبوونی هەڵوێستی حکومەتەکەی لە رووبەڕووبوونەوەی
ئاڵنگارییە ئەمنییەکان و ئابورییەکان لەسەر هەردوو ئاستی نێودەوڵەتی و دەرەکی.
ئەمە لەکاتێکدایە، بەهۆی جەنگی روسیا و ئۆکرانیاوە، ئەمریکا و یەکێتی
ئەوروپا دەستبەرداری وزەی روسیابوون و لە ئێستادا بەدوای جێگرەوەی ئەو سەرچاوەیەی
وزەدا دەگەڕێن و یەکێک لە بژاردەکانیش عێراقە کە خاوەنی یەدەگی نەوت و غازی
سروشتییە.