ئاماژەی بەوەشدا، ئەو رێککەوتنە دوای کۆمەڵە کۆبوونەوە و دیدارێک بەدەستهاتووە کە ساڵ و نیوێکی خایاندووە.

دەشڵێت، لەگەڵ سعودیەدا لە ماوەی دوو مانگدا باڵیۆزخانەکانیان دەکەنەوە و دەست بە چالاکی کونسوڵگەریی دەکەنەوە.

وتەبێژی وەزارەتی دەرەوەی ئێران باسی لەوەشکرد، لە ماوەیەکی نزیکدا، وەزیرانی دەرەوەی هەردوو وڵات کۆدەبنەوە و رێککەوتنەکەی تاران و ریازیش رەنگدانەوەی ئەرێنیی دەبێت لەسەر کێشەی یەمەن.

ئاماژەی بەوەشدا، بابەتی یەمەن و کۆتاییهێنان بە جەنگی ئەو وڵاتە، هەمیشە کاری لە پێشینەی ئێران بووە. ئەو کەشوهەوا نوێیە ئەرێنییەی لە پەیوەندییەکانی نێوان ئێران و سعودیە دروست بووە، دەرەنجامی ئەرێنیی و باشی دەبێت لە بابەتی یەمەندا.

دەشڵێت، ئێران باوەڕی وایە کە جەنگ لە یەمەن چارەسەر نییە، بەڵکو زیان بە یەمەن و سعودیە و هەموو ناوچەکەش دەگەیەنێت.

ناسر کەنعانی وتەبێژی وەزارەتی دەرەوەی ئێران ئەوەشی ئاشکراکرد، وڵاتەکەی بەشداریدەکات لەو لووتکەیەی رۆژانی ١٥ و ١٦ی ئادار لەنێوان تورکیا و سوریا و روسیا لە مۆسکۆی پایتەتخی رووسیا بەڕێوەدەچێت.

ئەمە لەکاتێکدایە، لە رۆژی ١٠ی ٣ی ٢٠٢٣ عەلی شەمخانی سکرتێری ئەنجومەنی باڵای ئاسایشی نیشتمانی ئێران و موسەید بن محەمەد ئەلعەیبان وەزیری دەرەوەی سعودیە و فانگ یی ئەندامی مەکتەبی سیاسی کۆمیتەی ناوەندی حزبی شیوعی چین لە پەکینەوە راگەیاندراوێکی هاوبەشیان لەبارەی رێککەوتنی سعودیە و ئێران بڵاوکردەوە.

بەپێی راگەیندراوەکە، ئەو دەستپێشخەرییە لەسەر داوای شی جین پینگ سەرۆکی چین بووە و پاڵپشتی لێکنزیکبوونەوەی ئەو دوو وڵاتە و خواستی هەردوو وڵاتی لەسەر چارەسەرکردنی کێشە و ناکۆکییەکان کردووە.

هەر ئەمڕۆش، فەیسەڵ بن فەرحان وەزیری دەرەوەی سعودیە رایگەیاند، رێککەوتنی نێوان وڵاتەکەی و ئێران بەمانای کۆتاییهاتنی سەرجەم گرفت و جیاوازییەکانی نێوانیان نایەت.

کـ - ئـ