کۆمسیۆنی باڵای هەڵبژاردنەکانی عێراق رایگەیاند، هیچ گۆڕانکارییەک بەسەر کاتی هەڵبژاردندا نایەت و بە هاوکاری دوو کۆمپانیای کۆری و ئەڵمانی و دەزگای هەواڵگری، بۆ جاری دووەم و سێیەم سێرڤەرەکانی هەڵبژاردن پشکنینى بۆ دەکەنەوە، بۆ ئەوەی ئامادەبن بۆ هەڵبژاردنی داهاتووی عێراق.
جومانە غەلای وتەبێژی کۆمسیۆنی باڵای هەڵبژاردنەکانی عێراق بە ئێن ئاڕ تی راگەیاند، پێدانی کارتی نوێ بەردەوام دەبێت و تاوەکو ئێستا زیاتر ٨٥٪ی دەنگدەران کارتەکانیان وەرگرتووەتەوە.
ئاماژەی بەوەشکرد،
زیاتر لە ١٠٠ چاودێر لە وڵاتانی یەکێتی ئەوروپا بۆ چاودێری هەڵبژاردنەکان دێنە عێراق
و نەتەوەیەکگرتووەکانیش زیاتر لە ٢٠٠ چاودێری نێودەوڵەتی بۆ پرۆسەکە دابینکردووە.
ئەوەشی خستەڕوو،
ئاسایشی بنکەکان پارێزراو دەبێت و هێزی ئەمنی فراوان بۆ پاراستنی بنکەکان دابین دەکرێت.
هاوکات لە هەموو بنکەکاندا هێزی ئەمنی و چاودێرانی نێودەوڵەتی و ناوخۆیی و نوێنەری
لایەنە سیاسییەکان ئامادە دەبن.
لەبارەی کاتی هەڵبژاردنەکەشەوە
وتەبێژی کۆمسیۆن بە ئێن ئاڕ تی وت، هەموو ئامادەکارییەکیان کردووە بۆ ئەوەی هەڵبژاردن
لە کاتی دیاریکراوی خۆیدا بەڕێوەبچێت و هیچ گۆڕانکارییەک بەسەر کاتی ئەنجامدانیدا
نایەت، هەڵبژادنی گشتی لە ١٠ تشیرینی یەکەمی ئەمساڵ ئەنجام دەدرێت و هەڵبژاردنی تایبەتیش
لە هەشت و نۆی ئەو مانگەدا بەڕێوەدەچێت.
بڕیارە رۆژى ١٠ى
مانگى ١٠ى ئەمساڵ، هەڵبژاردن لە عێراق بەرێوەبچێت جگە لەوەى کۆمسیۆن ئامادەکارییەکانى
تەواوکردووە، هەریەک لە نەتەوەیەکگرتووەکان و ئەنجومەنى ئاسایشى نێودەوڵەتى و یەکێتى
ئەوروپا و بەشێک لە وڵاتانى جیهان جگە لە هاوکاریی ماددى نوێنەرى تایبەتى خۆیان دەنێرنە
عێراق بە مەبەستى چاودێریکردنى پرۆسەکە و رێگرییکردن لە ساختەکاریی.