سەردێڕ:

دیسان مەندوبانی بەرژەوەندخواز

1/12/2021 8:35:31 AM
4294 جار خوێندراوەتەوە
ئاسۆ عەبدولەتیف
+ -

پێشووتر لە وتارێکدا ئەوەمان وت، بەشێک لەو پەرلەمانتار و مەندوبە نمایشکارە کوردیانەی بەغداد مۆدێلیزاسیۆنی بەرژەوەندگەرای خۆیانن، خەریکی پرۆژەو کاری سیاسی شەخسی و پراگماتیستی خۆیانن بۆ کاتی ھەڵبژاردن و دوانەکەوتن لە کاروان، بەمەبەستی یەک ئامانج ئەویش نەگەرانەوەیانە بۆ ھەرێم. ھەروەک توڕەو ھیلاکی ئەوەن کۆتاییان بێت و بگەڕێنەوە ھەرێم و نەتوانن لە سیستمی نوێی ھەڵبژاردن سودمەند بن و لەیەک کاتدا درێژە بە کاری مەندوبسازیی و عادەتی قەدیمی و ئۆپۆزسیۆن سالاریی و وەزیر ڕەفتاریی بدەن و لەو ھەموو عیلاقات و کەین و بەین و ئیمتیازو دەستکەوتە شەخسیانەش بێبەش بن.

ئەوەتا کارەکەیان مەیسەر بوو، کاریان کرد گوتاری سیاسی فەرمی قەوارەی کوردیی شەق بکەن بەدڵی خۆیان و ئەو تایپە حوکمڕانە مۆنۆپۆڵگەرەی شیعە کە ھاونەھجی یەکن، خۆیان گۆڕی بۆ لیستێکی پڕلە دروشمی لوس و قەبە و پێچاوپێچ، بە ناوی نوێنەرانی گەل و ھاوپەیمانی ھیوای کوردستان و بە گرانیش فرۆشتیانەوە بەخەڵکی کوردستان بە ناوی چاکسازیی و گەڕاندنەوەی موچەی فەرمانبەران. 
ئەمەش وەک ئاراستەیەکی سیاسیی و پەرلەمانیی بە تۆنێکی جیاواز لە گوتاریی حوکمڕانی کوردیی، بەڵام ئایا ئەم کردەیە مانای چییە جگە لە شکستی سیاسی پرۆژەی ئایدۆلۆژیی حیزبەکانیان؟ ئەگەر وا نییە چۆن دەبێت بە دوو ئاراستەی سیاسی دژبەیەک کاربکەن بۆ داھاتوو، ئەی وەڵامی حیزبەکانیان چی دەبێت لە داھاتوو ؟

ئەگەرچی ھەر ئاراستەیەکی سیاسی کوردیی، لەدەرەوەی ئیجماعی سیاسی و جڤاکیی بۆ گفتوگۆ لەگەڵ دەوڵەتی ئۆتۆکرات و مەزھەبی بەغداد، ریسک و سەرکێشییە بە ستاتۆی ھەرێم و دۆزەکەیەوە، لەلایەک ئەو بەشە لە کوردو تەکەتولێکی حیزبی کە ئاوا بیردەکاتەوە دەریچە بدۆزێتەوە بۆ لەحیم کردنی بەشێکی ھەرێم بە بەغداوە، چەمکی دەوڵەت- نەتەوەی، قبوڵ نییەو بە تۆپزیی دژی ڕیفراندۆم وەستانەوە بەبیانووی گەڕاندنەوەی شکۆی خەڵک و فەزیلەتی تاک و خۆشگوزەرانی، کەچی، لە بەغداد، ڕازین لەگەڵ تێرم و مێنتاڵێتی زاڵی شیعە کاربکەن، بەو ھەموو فەسادو خوێنبەربوونەوە، کە خاوەنی تێزی دەوڵەت- مەزھەبی نەتەوەیی و ویلایەتگەریی حەوزەو مەرجەعیەتیشن، کە تاک ئەکاتە یەک جەستەی بێڕۆح و کۆیلەیەکی بێنرخی دەوڵەتفاشی، بینیمان لە ساڵانی رابردوو شیعە چ جۆرە فۆرمێکی دەوڵەتداریی مومارەسە کرد.

ئەم ئاراستەیە بنەماخوازییەکی تیۆری و فیکرییشی نییە تیۆریزەو فۆڕمەڵەی خۆی پێبکات بۆ ئایندە، بەرمەبنای دوو ئاکت و جوڵە کاردەکەن، یەکەمیان دژایەتی و کاردانەوەیە بەرامبەر دەسەڵاتی سیاسی فیدراڵی ھەرێم، کە پەرچەکردارو حەماسەتە بۆ ھەڵبژاردن و گەیشتن بە چەورایی نەوت و بەرژەوەندیی حیزبیی، دوەمیان شوێنپێ کەوتنی ژاوەژاوی سیاسی و تائیفی و مەزھەبییە، ڤواھر الێوتی، کە دەوڵەتی مەزھەبی ویلایەتی فەقیھی میحوەر دروستی کردوە وەک ھەیەجان بۆ برسیکردن و نابوتکردنی کورد، کە ناشیرینترین جوڵەی ئەم تایپەی دەوڵەتی تازەو مۆدێرنی عێراقە.