PM:10:48:08/05/2022
6280 جار خوێندراوەتەوە
+
-
سەرۆکێ روسیا د سالیادا ژناڤبرنا نازیان ژ ئالیێ ئێکەتیا سۆڤیەت پیرۆزباهی ل وەلاتێن جیران کر و د ناڤ وان ژی دا ئۆکرانیا و گوت، "ڤەگەڕاندنا نازیان جهێ قەبیلکرنێ نینە".
د ڕاگەهاندنەکا کۆچکا کرملندا کو ب هەلکەفتا جەژنا سەرکەفتنێ بسەر نازیاندا هاتە بەلاڤکرن، ڤلادیمێر پوتین سەرۆکێ روسیا ب هەلکەفتنا ٧٧ سالیا سەرکەفتنا شەڕێ نشتیمان پەروەریێ پەیاما پیرۆزباهیێ بۆ سەرکردەیێن هەر ئێک ژ وەلاتێن ئازەربیجان و ئەرمینیا و بێلاروسیا و کازاخستانێ هنارتیە.
ئاماژە ب وێ یەکێ ژی کریە پوتینی پەیاما خۆ ئاراستەی سەرۆکێن قیرغیزستان و مۆلدۆڤا و تاجاکستان و تورکمانستان، ئوزباکستان و ئۆسیستا باشور وەلاتیێن کۆمارا گەلێ دۆنێتیسک و کۆمارا گەلێ لوهانسک هنارتیە.
هەر د ڕاگەهاندنێ ژی دا هاتیە ئەشکەراکرن، پوتین ب جودا پیرۆزباهی ل وەلاتیێن هەر ئێک ژ ئۆکرانیا و جۆرجیا ژی کریە.
پوتین بەحسا وێ یەکێ ژی کریە، "ئەڤرۆ ئەرکێ هەڤپشک بریتیە ژ رێگریکرنێ ژ دووبارەبوونا نازیان کو بوویە سەدەمێ وان هەمی ئێش و ئازاران بۆ مرۆڤان. پێدڤیە راستیان دەربارەی بوویەرێن سالێن شەڕی، بهایێن مەعنەویێن هەڤپشک، دابونەریتێن برایەتیێ و دۆستایەتیێ، بپارێزن و ب جیلێن داهاتی بگەهینین".
هەڤدەم سەرۆکێ روسیا، د پەیامەکێدا بۆ گەلێ ئۆکرانیا و شەڕکەرێن شەڕێ نشتیمانپەروەریێ تەکەز ل وێ یەکێ کریە کو ڤەگەڕاندنا میراتگرێ ئایدۆلۆجیێن وان کو د شەڕێ نشتیمانپەروەریا مەزندا شکەستن خاری، جهێ قەبیلکرنێ نینە.
ئەڤە ژی پشتی وێ یەکێ دهێت، زێدەتر ژ دوو مەهانە هێرشێن روسیا بۆ سەر ئۆکرانیا بەردەوامن و بەریا نها سێرگێ لاڤرۆڤ سەرۆک وەزیرێن وی وەلاتی ئاماژە ب وێ یەکێ کریە ل جەژنا سەرکەفتنا روسیا بسەر نازیاندا دێ وەلاتێ وی بەردەوامبیت ژ هێرشێن خۆ بۆ سەر ئۆکرانیا.