PM:12:06:29/01/2022
860 جار خوێندراوەتەوە
+
-
شاسوار عەبدولواحید سەرۆکێ ڤەلڤینا نەوەی نوێ ڕاگەهاند، ئەگەر بهێت و هەر ئالیەک ژ ئێکەتی و پارتی پرۆژەیێ یاسایا مە جێبەجێبکەن ئامادەینە بەربژێرێ خۆ ب ڤەکێشین و دەنگی بدەین ب بەربژێرێ وان.
ئەڤرۆ شەمبی، شاسوار عەبدوالوحید سەرۆکێ ڤەلینا نەوەی نوێ د کۆنفڕانسەکێ رۆژنامەڤانیدا ڕاگەهاند، لدەف وان وەک نەوەی نوێ وەسایە دەنگدان ب ئێک ژ بەربژێرێن دەستهەلاتێ ب بێ چ خزمەتەکا وەلاتیان و چ دەستکەفتەکێ بۆ وەلاتیان دژی هەمی بنەمایێن ڤەلڤینێ یە.
ئاماژە ب وێ یەکێ کر، نەوەی نوێ ئامادەیە هەمی دەنگ و کورسیان بدەتە هەر ئالیەکی دەستهەلاتێ ئەگەر بهێت و مەرجێن نەوەی نوێ جێبەجێ بکەت کو داخازیا وەلاتیێن هەرێمێیە.
هەڤدەم، شاسوار عەبدولواحید مەرجێن سەرەکیێن نەوەی نوێ بۆ دەنگدانێ ب ئێک ژ بەربژێرێن دەستهەلاتێ دیارکر و ئەڤەنە:
ئێکەم: دەملدەست ئەرزانکرن و ئاسایکرنا بهایێ غاز و گاز و پەنزینێ و پێتڤیێن وەلاتیان، گوت ژی، "پێتڤیە بەری هەلبژارتنا سەرۆکێ کۆماری بهێنە جێبەجێکرن".
دوو: دەملدەست لادانا باج و گشت رسوماتێن حکومی یان ژی کۆمپانیان لسەر وەلاتیان و دوکاندار و کاسبکاران.
سێیەم: دەملدەست ڤەکرنا هژمارەیەکا بەنکی بۆ تەڤایا مووچەخۆرێن هەرێمێ و دانانا دەمی بۆ ڤەگەڕاندن مووچەیێ فەرمانبەران ب رەنگەکێ مەهانە.
چار: دەملدەست دەست کرن ب پلە بلندکرنا فەرمانبەران.
پێنج: سوز ب جێگیرکرنا بابەتێ ڤەگەڕاندنا کەرکوکێ و ئاسایکرنا رەوشا باژێر و دەڤەرێن ڤەقەتیایی و هەڤئاوایی کرنا مووچەیێ پێشمەرگەی دگەل هێزێن عێراقێ کو پێتڤیە ل ناڤ بەرنامەیێن کارێ حکومەتا عێراقێ بهێتە جێگیرکرن و هەڤئاوای کرنا مووچەیێ خانەنشینێن هەرێمێ دگەل مووچەیێ خانەنشینێن عێراقێ.
شەش: دەستکرن ب پارڤەکرنا دەرمالەیێن خوێندکارێن زانکۆ و پەیمانگەهان.
حەفتەم: دامەزراندنا فەرمانبەرێن گرێبەست و خۆبەخش و رەخساندنا دەلیڤەیێن کاری بۆ دەرچوویێن نەهاتینە دامەزراندن.
هەشت: پێدانا مووچەیێ خانەنشین ب رێیا کارتا بەنکی ٣٠ رۆژان جارەکێ و دانانا ئامیرێ (ئەی تی ئێم)یێ پارە راکشانێ ل تەڤایا باژێر و باژێرکان بۆ وێیەکێ نە راوەستن بۆ وەرگرتنا مووچەیێن وان.
نەهـ:ئەنجامدانا هەلبژارتنێن هەرێمێ د دەمێ خۆدا و د ئەڤسالەدا.
دهـ: هەموارکرن یاسایا هەلبژارتنان و هەموارکرنا یاسایا کۆمیساران ب رەنگەکی ئەندامێن جڤاتا کۆمیساران بێ لایەن بن.
دبێژیت ژی، پێتڤیە بەری هەلبژارتنا سەرۆک کۆماری بهێنە جێبەجێکرن.
دەربارەی پشکداریکرنێ د پێکئینانا حکومەتا بهێت یا عێراقێدا ئەشکەراکر، "هەر دێ لسەر ئۆپۆزسیۆنی مینین و پشکداری حکومەتێ نابین".
گوت ژی، "لهەڤهاتن دگەل چ هێز و ئالیەکی نینە بۆ سەرۆک کۆماری و لدەف مە داخازیێن خەلکی گرنگن".
بەحسا وێ یەکێ کر، دانانا بەربژێرەکی بۆ پۆستێ سەرۆک کۆماری بۆ وێ یەکێ یە کو بسەلمینین ب تنێ پارتی و ئێکەتی نوینەر نینە بۆ پۆستێ سەرۆک کۆماری و بتنێ ئەو نوینەرایەتیا دەنگێن خەلکێ هەرێما کوردستانێ ناکەن.
ئەشکەرا کر، "هەردوو ئالیێن سیاسی داخاز ژ ڤەلڤینێ کریە کو دەنگی ب بەربژێرێن وان بدەین، لێ ئەم ب ئەشکەرا بەرسڤا وانا ددەین و دبێژین ئەگەر بەرسڤێن داخازیێن مە بدەن کو داخازیێن خەلکینە و ئەم دێ دەنگی دەینە بەربژێرێن وانا".
ئەڤە ددەمەکیدایە، ل هەلبژارتنێن پەرلەمانێ عێراقێ ل ١٠ی تشرینا ئێکێ ٢٠٢١ێ نەوەی نوێ کاری نەهـ کورسیان مسۆگەر بکەت. پشترا دگەل ڤەلڤینا ئیمتیداد و چەند پەرلەمانتارەکێن دیێن سەربخۆ کو سەرجەمێ وانا ٢٨ کورسینە، هەڤپەیمانیەک پێکئینا، شاسوار عەبدولواحید سەرۆکێ ڤەلڤینا نەوەی نوێ سەرۆکاتیێ دکەت.