AM:09:45:24/01/2022
1384 جار خوێندراوەتەوە
+
-
وەزارەتا پێشمەرگەیێ حکومەتا هەرێما کوردستانێ
ڕاگەهاند، ڤالاتیا ئەولەهیێ دناڤبەرا هێزێن پێشمەرگەی و سوپایێ عێراقێ دا هەر مایە
و نەهاتیە تژیکرن. دبێژیت ژی، "هەماهەنگیا بەردەوام و ئۆپەڕاسیۆنێن هەڤبەش
دناڤبەرا وان دا هەیە".
جەبار یاوەر ئەمیندارێ وەزارەتا پێشمەرگەیێ
حکومەتا هەرێما کوردستانێ بۆ دەنگێ ئەمریکا ڕاگەهاند، ڤالاتیا ئەولەهیێ دناڤبەرا
هێزێن پێشمەرگەی و سوپایێ عێراقێ دا هەر مایە و نەهاتیە تژیکرن.
ئاماژە ب وێیەکێ ژی کر، بڕیاربوو کو دوو
لیوایێن هەڤبەشێن تێکەل ژ پێشمەرگە و سوپایێ عێراقێ بهێنە دامەزراندن، لێ هێشتا
پێنگاڤێن داویێ ماینە لێ هەماهەنگیا بەردەوام و ئۆپەڕاسیۆنێن هەڤبەش هەنە.
دەربارەی شێوازێ ئەنجامدانا چالاکیێن
چەکدارێن داعش، ئەمیندارێ پێشمەرگەی بەحسا وێیەکێ کر، داعشێ شێوازێ چالاکیێن خۆ
گوهۆریە، نها وەکی گرۆپێن بچیک کارێن خۆ ئەنجام ددەت.
دبێژیت ژی، ل پتریا وان دەڤەرێن کو داعش لێ
بوو نها ژی لێ مایە وەکی عێراق، سوریا، یەمەن، ئەفغانستان، مسر و لیبیا و وەلاتێن
ئەورۆپا کارێ خۆ دکەت و د سوشیال میدیایدا هزرا خۆ یا توندڕەو بەلاڤدکەت.
جەبار یاوەر گوتژی، "هەیا نها ژی داعش
مەترسیە لسەر دەڤەرێ، مە دیتن بەریا دوو رۆژان شیا پەلامارا بنگەهەکێ عێراقێ بدەت
و ١١ کەسان ل وی بنگەهی بکۆژیت و ژبلی وێ
ژی هێرشکرە سەر گرتیگەها غوێران ل دەڤەرا حەسەکێ و نها ژی ل وێرێ هەر بەردەوامن
لسەر شەڕ و مەترسیێ".
بەحسا وێیەکێ ژیکر، داعش نەبتنێ ل چیایێ
قەرەچۆغن بەلکو ل پتریا وان دەڤەرێن ڤالاهیا ئەولەهیێ تیدایە دابەشبوویە و هێزێن
پێشمەرگەی و سوپایێ عێراقێ ژ خانەقین لسەر سنورێ ئیرانێ هەیا کو سنورێ سحێلا لسەر سنورێ سوریا نێزیکی ٥٦٠ کێلۆمەترانە، ژبلی
وێ ژی ل هندەک دەڤەرێن دەوروبەرێن بەغدا و ئەنبار و دەڤەرێن نێزیکی میسل و سوریا
هەنە. لێ ژمارەیەکا دیارکری نینە و خۆ
دگەل ڤی شێوازێ نهێنی گونجاندینە.