حکومەتا رێڤەبرنا کاران راگەهاند، وەزارەتێن ساخلەمی و دارایی و جڤاتا گشتیا راژەی ئەرکدار کرن دگەل وەزارەتا دارایی عێراقێ د پەیوەندیێ دا بن، بۆ دامەزراندنا دەرچوویێن کۆلیژیێن نۆژداری بۆ سالا ٢٠٢٤ێ.

ئەڤرۆ چارشەمبی، حکومەتا رێڤەبرنا کاران راگەهاندنەک بەلاڤکر و تێدا هاتیە، د کۆمبوونا حکومەتا رێڤەبرنا کاران دا بەحسا ئاریشەیا وان کەسان ژی هاتیە کرن کو لسەر میلاکێ سازیێن حکومەتا رێڤەبرنا کارێن هەرێمێ ب هەردەمی و گرێبەست هاتینە دامەزراندن.

هەر د وێ راگەهاندنێ دا هاتیە، حکومەتا رێڤەبرنا کاران وەزارەتا دارایی ئەرکدارکریە کارێ پێدڤی بۆ دابینکرنا مووچەیێ وان کەسان ئەنجام بدەت و کاری بۆ چارەسەرکرنا ئاریشەیا خەرجکرنا مووچەیێن وان بکەت.

ئەو یەکژی بەرچاڤکر، تەوەرەکێ دی یێ وێ کۆمبوونێ تایبەت بوو ب دامەزراندنا دەرچوویێن پشكێن نۆژداری، حکومەتا رێڤەبرنا کاران، وەزارەتێن ساخلەمی و دارایی و جڤاتا راژەی ئەرکدارکرن، کارێ پێدڤی بۆ وان دەرچوویان بکەن و ئەنجامێ بزاڤێن خۆ د کۆمبوونا داهاتی دا بەرچاڤ بکەن، دا کو بڕیار لسەر دامەزراندنا وان بهێتە دان.