AM:09:51:16/05/2023
2008 جار خوێندراوەتەوە
+
-
ل رۆژا ١٤ێ ڤێ مەهێ هەلبژارتنێن
تورکیا بڕێڤەچوون و دناڤدا لگۆر ئەنجامێن بەرایی دەنگێن پارتیا دیموکراتیا گەلان
"هەدەپێ" کێمکرینە و شەش کورسیێن پەرلەمانی ژ دەستدانە.
د وێ دەربارێ ژی دا جەبار
قادر پسپۆرێ کاروبارێن تورکیا بۆ دەنگێ ئەمریکا راگەهاند، "هندەک ژ دروشمێن هەدەپێ
دگەل هێزێن پارێزگاران 'محافزکاران"یێن جڤاکێ ناگونجیێن، کو رێژەیەکا زۆر پێکدئینن
و ب تایبەتی ئەوێن کو باسکا ئیسلامینە، ب ئەشکرا خۆ دایە دگەل ئەردۆغانی دا."
وی پسپۆرێ تورکیا پێشبینیکر،
د خولا دوویێدا ئەردۆغان سەر بکەڤیت و دبێژیت، "وەسا دیارە سینان ئۆغان داخازێ
ژ ئالیگرێن خۆ بکەت دەنگی بدەنە ئەردۆغانی ژبەرکو هندەک ئاخفتن کرینە لسەر وێ نێزیکبوونا
جەهەپێ و هەدەپێ ژ هەڤدوو."
د وێ دەربارێ ژی دا ئۆغان
بۆ ئاژانسا رۆیتەرز راگەهاندیە، "دێ دگەل دەنگدەرێن خۆ گۆتوبێژێن وێ بریارێ کەین
بۆ خولا دوویێ یا هەلبژارتنان. لێ مە ئەویەک زەلالکریە کو شەرێ دژی تیرۆرزمێ و هنارتنا
پەنابەران هێلا سۆرە بۆ مە."
هەڤدەم، ئۆغان ئاماژە
ب وێ ژی کریە، پشتی دەنگدانا ڕۆژا ئێکشەمبیێ تا نها چاڤپێکەفتن دگەل ئەردۆغان و کیلیچدارئۆغلودا
نەکریە، لێ "ب پشت گرێدان ب بنەمایان" دەرگەهێ وان بۆ گۆتوبێژان ڤەکری دبیت.
گۆتژی، "بۆ نموونە
دشێین پرۆتۆکۆلەکێ دگەل هەڤپەیمانیا نەتەوەیی بۆ ( پشتەڤانیا کلیچدارئۆغلو) ئیمزا
بکەین، بۆ کو زەلال ببیت کو ئەو چ دەسهەلاتەکێ ب هەدەپێ نادەن."
لگور ئەنجامێن بەراییێن
هەلبژارتنێن تورکیا هەدەپە کو ل ژێر ناڤێ پارتیا چەپا کەسک پشکداریا هەلبژارتنان
کربوو شیایە ٦١ کورسیێن پەرلەمانی ژ کۆما ٦٠٠ کورسیان بدەستڤەبینیت، لێ دگەل وێ ژی
دا شەش کورسی ژ دەستدانە و تا نها هەدەپە هێشتا د پەرلەمانی دا سێهەم مەزنترین
پارتیا سیاسییە.
هەدەپێ ل ڤان باژێران زۆرترین
دەنگ بدەستڤە ئیناینە: دێرسیم، ئامەد، مێردین، ئەلێ (باتمان)، موش، شیرنەخ، سێرت،
بەتلیس، ئاگری، قەرس، ئیدر، وان و جولەمەرگ ( هەکاری ).
هەدەپێ ڕێژەیا ئاستەنگا
٪٧ دەربازکریە و ٪١٠.٥٤ێ یا دەنگان بدەستڤە ئیناینە، لێ ب هەڤبەر دگەل هەلبژارتنێن
سالا ٢٠١٨ ێ لگور ئاژانسا ئەنادۆلو شەش کورسی ژ دەستدانە، هەرچەندە ئەڤ ئەنجامە هێشتا
ئەنجامێ فەرمی نینە.
لگور یاسایا تورکیا هەر
پارتەکا سیاسی بشێت د هەلبژارتنێ دا ٪٧ دەربابکەت ل وی دەمی ژ ئالیێ خەزینەیا دەولەتێ
بودجە بۆ هێتە دابینکرن، هەیا کو ئەگەر دگەل هەڤپەیمانیەکێ ژی دا پشکداربیت ب تنێ
ژی وێ ڕێژێ بدەستڤەنەئینیت دێ هەر وی بودجەی وەرگریت.
لگۆرەی ئەنجامێن دەستپێکی
یێن هەلبژارتنێن تورکیا یا ٪١٠٠ێ یا دەنگێن جوداکری، ئەردۆغانی ٪٤٩.٥٠ێ یا دەنگان بدەستڤە
ئیناینە و کلیچدارئۆغلو ٪٤٤.٨٩ ێ یا دەنگان بدەستڤەئیناینە و بەربژێرێ سێ یێ ژی سینان
ئۆغان ژ هەڤپەیمانیا ئاتا ٪٥.١٧ێ یا دەنگان بدەستڤە ئیناینە. ژبەر وێ چ ژ بەربژێران
نەشیاینە بگەهنە ٪٥١ێ یا دەنگان ژژبەر وێ هەلبژارتنێن سەرۆکاتیێ دچیتە خولا دوویێ
و خولا دوویێ ژی هەلبژارتنێن سەرۆکاتیا تورکیا ل ٢٨ێ ڤێ مەهێ دهێتە ئەنجامدان.
کۆمسیۆنا بلندا هەلبژارتنێن
تورکیاژی دبێژیت ڕێژەیا پشکداریا دەنگدانێ ل تورکیا ٪٨٨.٩٢ بوویە و ژ دەرڤەی ولاتی
ژی ٪٥٢.٦٩ بوویە.