PM:08:06:25/03/2023
2960 جار خوێندراوەتەوە
+
-
وەزارەتا
سامانێن سروشتی یێن هەرێمێ ڕاگەهاند، بڕیارا دادگەها فەرەنسی د بەرژەوەندیا
حکومەتا عێراقێ دژی تورکیا، ڕێگر نابیت ل پەیوەندیێن د ناڤبەرا هەرێمێ و بەغدا.
دبێژیت ژی، "دێ سەرەدانا بەغدا کەینەڤە بۆ گۆتوبێژکرن و چارەسەرکرنا بابەتێن
پەیوەندیدار".
وەزارەتا
سامانێن سروشتی یێن حکومەتا دەم بسەرڤەچوویا هەرێمێ پشتی کو وەزارەتا پەتڕۆلا
عێراقێ ڕاگەهاندی، ل دادگەها پاریس ل دژی تورکیا ئەو کەیس بریە، ڕاگەهاندنەک
بەلاڤکر.
د وێ
ڕاگەهاندێ دا ئەویەک هاتیە، "حکومەتا هەرێما کوردستانێ د ڤان چەند مەهێن
داویێ دا، ل گۆتوبێژ و دانوستاندنێن بەردەوام دابوویە دگەل حکومەتا فیدڕالی و داوی
جار لسەر پرسێن بوودجە و پەتڕۆل و گازێ، هەردوو ئالی گەهشتینە لهەڤهاتنا دەستپێکی
و لهەڤتێگەهشتنا باش و د کڤانا دەستوری دا، ماف و شایستەیێن دەستوریێن هەرێما
کوردستانێ دێ هێنە دابینکرن".
ئاماژە ب
وێیەکێ ژی کریە، سەرۆکێ دەم بسەرڤەچوویێ حکومەتا هەرێما کوردستانێ ژی، د
پەیوەندیێن بەردەوام دایە دگەل سەرۆک وەزیرێن فیدڕال، پشتی سەرەدانا سەرۆک وەزیرێن
فیدڕال ژی بۆ هەرێما کوردستانێ، تەکەزی ژ چارەسەرکرنا ئاریشەیان لسەر بنەمایێ
دەستوری هاتیەکرن.
د ڕاگەهاندنا
وەزارەتا سامانێن سروشتی یێن هەرێمێ دا هاتیە، "بڕیارا دادگەها فەرەنسی د
بەرژەوەندیا حکومەتا عێراقێ دا دژی تورکیا، ڕێگر نابیت ل پەیوەندیێن د ناڤبەرا
هەرێمێ و بەغدا دا".
ئەویەک ژی
بەرچاڤکریە، د ڤێ دەربارێ دا حکومەتا هەرێمێ زێدەباری دووپاتکرنا هەلویستا نەگۆڕا
خۆ ل دەستبەرنەدان ژ مافێن دەستوریێ گەلێ کوردستانێ، بەردەوام دبیت ل پەیوەندیێن
خۆ دگەل بەغدا هەیا گەهشتن ب چارەسەریا بنەرەتی و یاسای و دەستوری.
ئەڤە د دەمەکی دایە، ئەڤرۆ وەزارەتا پەتڕۆلا عێراقێ ڕاگەهاند، ئەو سکالایا ل دادگەها پاریس لسەر نەیاسایبوونا هنارتنا پەتڕۆلا
هەرێمێ بۆ تورکیا بریە. تورکیا ژی دبێژیت، ڕێزێ ل بریارا دادگەها پاریس دگرین".