AM:09:10:13/02/2026
316 جار خوێندراوەتەوە
+
-
فلیک دوپاتیکردەوە ناوبژیوان هەڵەی زۆری کردووە و
بۆ یاری داهاتووش متمانەی بە تیپەکەی هەیە.
هانسی فلیکی راهێنەری بەرشەلۆنە دوای شکستە
قورسەکەی بەرامبەر ئەتلەتیکۆ مەدرید بە تۆنێکی پڕ لە وریایی و لە هەمان کاتدا رەخنەگرانە
لەبەردەم میدیاکاندا دەرکەوت و رایگەیاند کە نایەوێت بیانوو بهێنێتەوە چونکە
تیپەکەی لە نیوەی یەکەمدا بە خراپی دەرکەوتووە، بەڵام جەختی لەوە کردەوە کە هێشتا
بڕوای بە گەڕانەوە لە یاریی داهاتوودا هەیە.
ئاماژەی
بەوەش کرد، هەرچەندە ئەنجامەکە قورسە، بەڵام کارەکە کۆتایی نەهاتووە و لە یاریگای
خۆیاندا بۆ گەیشتن بە کۆتایی دەجەنگن، چونکە پێیوایە تیپەکەی توانای ئەوەی هەیە لە
هەر نیوەیەکی یارییەکەدا دوو گۆڵ تۆمار بکات.
فلیک
دانی بەوەدا نا کە لە نیوەی یەکەمدا وەک تیپێک دەرنەکەوتوون و مەودای نێوان
یاریزانەکان زۆر بووە، بەڵام سەرەڕای ئەوەش شانازی بە کۆی گشتی ئاستی یاریزانەکانی
لەم وەرزەدا دەکات و داوای لە هاندەران کرد لە یاری گەڕانەوەدا پاڵپشتییان بکەن.
لەکاتی گواستنەوەی باسەکە بۆ سەر ناوبژیوانی
یارییەکە، فلیک نەیتوانی بێدەنگی هەڵبژێرێت و بە توندی ڕەخنەی لە بڕیارەکان گرت،
بەتایبەت سەبارەت بەو کارتە زەردانەی کە دەبوو بە ڕکابەرەکەیان بدرێت و نەدرا، کە
بە بڕوای ئەو دەبووە هۆی گۆڕینی ڕەوتی یارییەکە.
هەروەها راهێنەرەکە بە تووڕەییەوە باسی لە
دواکەوتنی حەوت خولەکیی سیستەمی ڤار کرد بۆ پشکنینی گۆڵەکەی کوبارسی و ئەو کارەی
بە کارەسات وەسف کرد، چونکە پێیوابوو گۆڵەکە دروست بووە و هیچ ئۆفسایدێک بوونی
نەبووە و ناوبژیوانانیش هیچ ڕوونکردنەوەیەکیان پێنەداون.
فلیک
ئاماژەی بەوەش کرد کە ئەمە خراپترین ڕۆژی ئەو نەبووە وەک ڕاهێنەر، بەڵکو یارییەکەی
بەرامبەر ئینتەر میلان بە خراپترین یادگاری دەزانێت، لە کۆتاییدا سەبارەت بە گۆڕانکاریپێکردنی
کاسادۆ رایگەیاند کە لەبەر مەترسی وەرگرتنی کارتی سوور لەو یارییە پڕ لە
توندوتیژییەدا، ناچار بووە لە پێناو پاراستنی تیپەکەیدا ئەو یاریزانە بباتە دەرەوە